Tata y famia a lanta contra abogado di acusado Izak Principaal

Esnan di CEA y KIA a core actua den Corte

• President di Hof tambe a hala atencion di Abogado
• Famianan ainda ta sufri di perdida di Sayuri 

ORANJESTAD (AAN): Diaranson mainta den sala di Corte, un miembro di CEA y dos miembro di KIA cu tabata e momento ey den sala, mester a actua pa evita un confrontacion formal entre tata y famia di e victima Sayuri Petronia y e abogado di e acusado Izak Principaal.

   Corte supremo a ordena hof pa drecha sentencia: Diaranson mainta Hof a trata e decision di Corte Supremo riba e sentencia di Hof contra Principaal, kende dia 4 Juni 2021 a tira Sayuri Petronia (19) mata den e cas caminda Principaal tabata keda na San Nicolas.

      Ta asina cu Hues di Corte den Promer Instancia a usa e ley di adulto contra Principaal (17) den e caso, mirando e serie di delitonan cu el a haci. Hues a condena Principaal na 9 aña di prison. E sentencia a wordo apela y Hof despues di tratamento di e caso, a uza e ley hubentil contra Principaal y a conden’e na 4 aña di prison y tambe pa tratamento obligatorio den un instituto. E sentencia aki tambe a wordo apela y Corte Supremo na Hulanda a haya cu Principaal ta culpabel di a tira mata Sayury Petrona conoci como ‘Sayu’, pero cu e castigo cu Hof a duna no ta corecto. Hof no por duna castigo di prison y banda di esey tambe tratamento obligatorio den un instituto. Sea e ta castigo di prison of tratamento obligatorio. Corte Supremo a ordena Hof di Corte Superior pa drecha e sentencia.

   Famia a lanta contra abogado: Durante tratamento di e caso, abogado mr. Kock, di Principaal, a hiba palabra. Den sala di Corte tambe tata presente tata y famia di e victima Petronia.

   Tambe tabata presente e mama di Principaal. E abogado a haci cierto expression cu a pone e famia di e victima rabia. E abogado a bisa Hof cu e ta garantiza Hof cu Principaal no ta un asesino. Manera e abogado a expresa esey, e tata y famia di e victima Petronia a cuminsa reclama den voz halto. Nan a lanta para y zwaai man den direccion di e abogado mustrando cu Principaal a tira Sayuri mata.

   Miembronan di CEA y KIA a actua: E tata, tabata masha hopi rabia y tabata reclama e abogado formal. E famia tambe a cuminsa reclama y tur a cuminsa cana bay den direccion di e abogado. Di biaha por a mira cu un miembro di CEA y dos cuidador di preso di KIA a actua. Un miembro di CEA y un miembro di KIA a cana bay riba e famia mientras cu e otro miembro di KIA a bay para dilanti e abogado, cara pa e famia cu tabata bay riba e abogado.

   E miembro di KIA a indica na e abogado pa e keda keto, mientras cu e otro dos miembronan a tene e famia y calma nan. E tres Huesnan cu ta forma Hof, Procurador General, Griffier a keda sinta tras di e mesa berde mira kico ta pasando. E traductor cu tabata sinta banda di Principaal, a lanta para y hala un banda. No a dura mucho cu e miembro di CEA y e dos miembronan di KIA tabatin e situacion bou di control.

   Hala atencion di abogado y famia: E presidente di Hof a hala atencion di abogado mr. Kock pa e midi su expresionnan, mirando cu esakinan ta afecta famia di e victima.

   E presidente di Hof tambe a dirigi na e famia di e victima. El a bisa cu e ta compronde nan emocion pero cu si un biaha mas nan comporta manera nan a caba di haci, e lo laga saca nan for di sala di Corte. Despues di esaki, e tratamento di e caso a sigui trankil.