Ta urgi Gobierno pa yega na un acuerdo husto pa trahadonan di limpiesa di SKOA

Señora Magaly Brito di SEPPA

ORANJESTAD (AAN): Un situacion cu pa hopi aña ta perhudica un grupo grandi di trahadonan di limpiesa di SKOA, ainda no tin solucion. Ta trata di homber y muhenan balente cu no ta gana un salario halto. Al contrario, Señora Magaly Brito di SEPPA a remarca na DIARIO, nan salario ta hopi abou pa e peso di trabou cu tin. Y cu e peso aki ta bira mas grandi door cu tin trahadonan cu a dicidi di retira y no keda mas den e situacion aki. E peso ta keda riba e trahadonan cu a keda, pasobra SKOA no a busca mas personal y lo no haci esaki tampoco tanten cu no tin claridad riba e problematica aki. 

Gobierno ta subsidia e trahadonan di SKOA. Señora Brito a duna di conoce cu tin casonan andando den corte ainda y ta tardando. Mientras e trahadonan tin pa warda pa nan situacion mehora. Señora Brito a remarca cu SEPPA ta kere cu e caso contra SKOA ta gana caba solamente mester bin un claridad si ta Gobierno ta debe SKOA of ta SKOA debe Gobierno, pa nan yega na otro pa despues tambe por enforsa SKOA pa paga e trahadonan manera mester ta. 

El a indica cu e problema ta bay bek na 2019, unda cu e exminister Lampe di Enseñansa a tuma e decision pa cambia con ta duna subsidio na e fundacion pa paga e trahadonan. El a enfatisa, cu ainda tin espacio pa Gobierno haci cambionan pa asina subsidia e trahadonan ainda y pone mas fondo disponibel pa e derechonan di e trahadonan keda cumpli.

 “Den combersacion cu Minister di Enseñansa Gerlien Croes, el a indica cu mester warda riba resultado di casonan di LAR. Pero di otro banda nos kier pa tur hende comprende tambe cu e situacion aki na final ta perhudicando e trahadonan cu no ta gana un salario halto mientras nan tin un peso di trabou pisa pa un salario hopi abou. E situacion aki mester un solucion, no di ayera, pero di hopi tempo caba y nos ta urgi Gobierno di Aruba cu ta subsidia e trahadonan aki pa sinta na mesa pa asina yega na un acuerdo husto pa nan”, señora Brito a remarca.