Suspenso mundial pa regreso di Trump na timon di Merca!

Mundo a bira coleccion di posicion diferente enfrente Estados Unidos

*Tur proyeccion economico pendiente di decision den Cas Blanco

*Presencia Trump central den futuro di petroleo te cooperacion mundial 

ORANJESTAD(AAN)—Presidente Trump a bolbe na timon di Estados Unidos. Esaki tabata e noticia mas importante di ayera na tur parti di mundo, cu den hopi tempo no a conoce cambionan y desaroyonan manera tabata e caso e ultimo dianan prome cu Donald Trump atrobe a presta huramento como lider nobo di Estados Unidos y sin duda di mundo tambe.

E diferente formanan cu no solamente paisnan pero tambe negoshinan rond mundo a expresa nan mes en espera di e momento cu Donald Trump a bira Presidente di Estados Unidos, ta marca e toma di poder cu atencion publico mundial mas grandi y varia rond mundo.

Cu mundo por spera hopi cambio, sin duda tabata wordo spera. Sinembargo, sigui tur e preparacionnan cu henter mundo tabata tuma, ta algo historico.

Mientras na Aruba mes tur hende ta cana cu preguntanan tocante e resultado directo cu regreso di Trump por tin pa tur pais na mundo, e contesta directo riba e preguntanan aki, tabata drenta tras otro.

E ta cuminsa den porta di Aruba por ehempel cu Nicolas Maduro cu a lanza e posibilidad cu e por bay libera Puerto Rico di Merca, cu ya a wordo pidi pa asisti Puerto Rico si Maduro presenta na costa, te e pregunta grandi kico por pasa cu Canal di Panama,  Golfo di Mexico y hasta teritorionan Canades.

Mientras ayera un indicacion mas directo no a wordo duna di parti di Presidente Trump, loke si a bini dilanti ta cu petroleo lo no bandona e panorama economico mundial, pero cu Merca ta sigui cu su negoshi den petroleo y productonan petrolero, loke ta nifica un cambio total den e maneho mundial enfrente cambio di clima.

Si te cu algun dia pasa mundo ainda tabata biba cu e pensamento cu e situacion na Medio Oriente hunto cu confrontacionnan na Ukraine por a provoca un Guera Mundial cualkier momento, ayera ya por a mira e caranan contento na Medio Oriente caminda a yega por lo pronto na un entendimento pa stop confrontacionnan, loke ta permiti refugiadonan cu mester a bandona nan cas, bolbe nan lugar aunke no tin garantia di un pais total.

Na Ukraine tambe e situacion ta pendiente. Presidente di Ukraine a dicidi di lanza un atake nobo riba Rusia pendiente di e toma di poder di Trump y Rusia na su turno ta biba cu e speranza cu un combersacion cu Trump por trece un solucion.

Mientrastanto na Merca mes, e Ministerio di Defensa Mericano a dicidi di deshaci di e portret di su general Mark Milley, cu no ta un persona cu ta conta cu amor di Trump, cu ta coinsidera Milley un traidor di Merca.

Prome cu Presidente Joe Biden a bandona Cas Blanco ayera, el a firma documentonan pa garantisa pordon na Milley y otro enemigonan di Trump.

Kico lo cambia riba tereno di cooperacion mundial, sigur ta un pregunta grandi pasobra Presidente Donald Trump a basa su mes completamente riba un ampliacion y modernisacion economico di Merca.

Na mes momento e ta schrap tur loke ta den caminda pa Merca como pais yega na solucion pa su problemanan, loke tin hopi pais den suspenso mientras Comunidad Europeo cu for di final di Segunda Guera Mundial ta hopi dependiente di Merca pa su seguridad, tambe ta den fila pa atende nan asunto cu e Presidente Mericano.

Proyeccionnan economico mundial tabata indica ayera cu hopi ta depende di decisionnan di Presidente Donald Trump y su promesa di pone un fin na burocracia y duna inicio na un temporada economico nobo pa Merca.

Kico futuro lo trece pa cantidad di immigrantenan y personanan cu no a drenta Merca na forma legal y e lista largo di personanan cu a pensa cu nan lo por cuminsa un bida nobo na Merca ta parti di e suspenso total cu cual mundo ta enfrenta inicio di e termino nobo di gobernacion di Presidente Donald Trump, cu por ricibi un sosten amplio na varios parti di mundo caminda voznan ta lanta pa gobiernonan na prome lugar atende problemanan na cas y despues bay presta yudansa pafor di nan pais.