Surplusnan continuo den e balansa di pago cu reservanan amplio

“Economic Outlook” di Banco Central di Aruba (BCA)

ORANJESTAD (AAN): Banco Central di Aruba (BCA) a publica su “Economic Outlook” di mas recien pa e Balansa di Pago (BdP). E publicacion aki ta contene pronosticonan economico riba termino cortico (2025-2026) y termino medio (2027-2029).

Den e prome kwartaal di 2025, e BdP a registra un surplus di Afl. 319,1 miyon, reflehando un surplus den e cuenta coriente di Afl. 534,5 miyon y un salida netto di Afl. 197,8 miyon den e cuenta financiero. E surplus den e cuenta coriente a baha compara cu e mesun kwartaal di 2024, debi na un subida den importacion. Den e cuenta coriente, e surplus di servicionan a subi levemente, causa pa entradanan mas halto relata na turismo, pero na mes momento esaki a wordo mitiga door di un aumento den pagonan pa servicionan di exterior. Mientrastanto, e salida netto den e cuenta financiero a registra un caida fuerte compara cu e mesun kwartaal di aña pasa. Esaki tabata relata primordialmente na un salida financiero grandi den e cuenta di inversion directo den e prome kwartaal di 2024, mientras cu den e prome kwartaal di 2025 tabatin un entrada netto. E salida financiero den prome kwartaal di 2024 a refleha un compra di accion den un hotel door di residente for di no-residente.

E pronostico di referencia pa e BdP pa e termino cortico (2025-2026) y termino medio (2027-2029) ta asumi un continuacion di e desaroyonan den e BdP observa den e prome kwartaal di 2025. Entradanan halto den turismo ta e causa principal di e surplusnan continuo den e cuenta coriente y, consecuentemente, e BdP, mientras cu e entradanan aki ta wordo mitiga pa gran parti door di e importacion di mercancia. Ademas, e cuenta financiero ta proyecta pa sigui registra salida netto riba termino medio. A base di e desaroyonan aki, BCA ta pronostica cu reservanan internacional lo keda adecua riba termino cortico, cubriendo entre 7,9-8,6 luna di e cuenta coriente (minimo recomenda: 3,0 luna). Pa loke ta reservanan oficial, BCA ta proyecta cu esaki lo keda alrededor di e limite superior di 150,0% di e “Assessing Reserve Adequacy (ARA) metric” di e Fondo Monetario Internacional (IMF).

E pronostico aki ta refleha un escenario di referencia y consecuentemente e pronostico ta suheto na un mescla di riesgonan domestico y internacional. E riesgonan aki ta inclui por ehempel un crecemento lento den turismo, tensionnan politico incluso e continuo guera comercial y e situacion tenso entre Merca y Venezuela, un subida den inflacion, un mercado laboral mas preta, un retraso den proyectonan di inversion, y ahustacionnan den maneho fiscal di gobierno.