Super Do It Center tambe ta celebra 50 aña Himno y Bandera y 40 aña Status Aparte

Hunto cu comunidad, Diaranson 18 di Maart na Parkinglot na Shaba:

• Cu tremendo evento cultural na nan sede principal 

ORANJESTAD (AAN) Super Do It Center Shaba a convoca un conferencia di prensa, den cual Lisanne Coffy, Relacionista Publico, a duna un fenomenal bon noticia pa Aruba.

   Lisanne a cuminza bisando cu tur hende sa cu e aña aki Aruba completo tin un celebracion  na grandi, pa conmemora 40 aña di Status Aparte di nos Pais, y 50 Aña di nos Himno y Bandera.

“Nos como un compania completamente local, un di e supermercadonan mas grandi y unico cu ta di doñonan Arubiano, ta bay uni na e celebracion aki tambe na grandi.

Locual nos kier trece padilanti ta cu dia 18 di Maart, nos ta bay tin un celebracion cultural grandi, riba nos parkinglot aki na Shaba.

   E tienda lo ta habri for di 10’ or di mainta te cu 6 or di atardi. Nos tin cooperacion di tur colega cu si kier ta sinti cu nan mester uni na e celebracion aki”, Lisanne a duna di conoce.

   El a informa cu di 10’or di mainta te cu 12’or y mey, lo bay tin e dama escritor, señora Claudia Ponson, cu lo tey cu su buki “R.A.T.S” cu ultimo dianan ta haciendo furor. Pa tur cu ta interesa di cumpra e buki cu autografo di e autor, pues e lo ta presente.

   Seguidamente, señor Lyonel Dirksz a hiba  palabra, y el a menciona cu el a wordo acerca pa duna un man den e programa di celebracion di nos Dia Nacional di Himno y Bandera.

   El a duna di conoce cu e parkinglot ta bay ta parcialmente cera p’asina aki lo por crea un setup, un logistico, pa por celebra hunto cu comunidad e di 40 aniversario di Aruba su Status aparte y 50 aña di Himno y Bandera.

   “Evento, na parti pafo ta programa pa cuminza cu musica tipico, sigui pa Arthur Kelly cu su Cah’i Orgel, cu no por laga afo, lo ta bay tin un playground tambe cu lo wordo crea masha grandi mes, unda cu muchanan di 0 pa 6 aña por diverti y goza, y tur esaki tra completamente gratis”, Lyonel a trece dilanti.

Lyonel a sigui indica cu na e momentonan aki nan ta invitando diferente artista, infantil, hubenil y grandi cu a participa siman pasa den nos festival Un Canto pa Aruba, y cu a cay den premiacion, y esnan cu a participa, pa nan por ta presente tambe y presenta nan cancion.

   “Nos ta bay tin diferente grupo di baile tambe, entre otro Gucci Dancers y Destiny Dancers, pa duna homenahe na nos musica cultural  y cada un di nan cu nan diferente presentacion di baile.

   Banda di esaki nos ta bay un rato di diferente wega popular. Do It Center ta kere ta kere pa mantene weganan popular, unda famia, mucha y hobennan por bin hunto y participa den diferente wega di antes y banda di esey, por gana premio tambe durante e atardi aki. Di 3’or padilanti lo tin un ‘car -show’ cu autonan clasico.  Finalmente, ora cu nos yega oranan mas atardi di 5’or pa 6’or, cu e evento finaliza ta bay tin Robert Maduro, cu su tipico Azucar cu lo bay deleita e publico”, Lyonel Dirksz a informa.