Studiantenan di Universidad di Aruba ta conoce gobernacion di cerca

Teoria y practica:

ORANJESTAD (AAN): Recientemente un grupo di 20 studiante di segundo aña di programa OGM (Organization, Governance & Management) di Universidad di Aruba a haci un bishita na Bestuurskantoor, unda tabatin presentacion y intercambio cu Prome Minister Mike Eman.

E bishita a forma parti di e modulo Constitutional and Administrative Law (CAL), un curso fundamental cu ta duna e studiantenan un comprension profundo di con gobierno ta funciona, con decisionnan politico y administrativo ta wordo tuma, y con ciudadano por influencia esakinan den un estado democratico.

Den e module, studiantenan ta studia principio basico di derecho publico, incluyendo diferencia entre derecho publico y priva, y e rol di derecho constitucional y administrativo den regulacion di accion di gobierno. Tambe ta pone enfasis riba concepto importante manera separacion di poder (trias politica), derecho fundamental di ciudadano y e proceso di tuma decision den sector publico.

Ademas, e curso ta trata e sistema constitucional di Aruba den Reino Hulandes, permitiendo studiantenan compara sistema politico y administrativo y compronde miho e posicion di Aruba den un contexto regional y internacional.

Durante e bishita, ademas di Premier Eman tambe tabata presente Minister Mervin Wyatt-Ras, y aki studiantenan a haya oportunidad pa conecta e teoria cu practica, mirando con e principionan cu nan ta studia ta aplica den realidad di gobernacion diario. E intercambio a inclui dialogo activo, unda pregunta y reflexion riba politica publico, gobernacion y participacion di ciudadano tabata central.

Prome Minister Eman, kende durante su trayectoria politico a pone enfasis riba educacion civico y desaroyo di liderazgo entre hoben, a subraya e importancia di involucra futura generacion den proceso di gobernacion. Segun su vision, un comunidad fuerte ta cuminsa cu hoben cu ta compronde nan rol den sociedad.

E bishita na Bestuurskantoor ta forma parti di un esfuerso pa conecta educacion academico cu realidad di gobernacion, preparando studiantenan pa desempeña un rol activo den futuro di Aruba.