Studiantenan di Universidad a presenta raportahe detaya na Aruba Timeshare Association

ORANJESTAD (AAN): Studiantenan di segundo aña di Facultad FHTMS di Universidad di Aruba a realisa recientemente e di tres encuesta amplio entre bishitanten di timeshare,

siguiendo asina un tradicion di investigacion cu a cuminsa na 2008, sigui p’un di dos estudio na 2017.
  E encuesta mas recien a keda conduci na 2025 pa binti-cinco (25) studiante, cu respuesta di mas cu 3500 doño di timeshare, y algun bishitante cu a keda na hotel di timeshare riba henter e isla.

   E resultado a keda presenta oficialmente durante un reunion organiza pa Aruba Timeshare Association, den e ballroom di La Cabana Beach Resort & Casino. E evento a conta cu presencia di e miembronan di Aruba Timeshare Association, facultad universitario y invitadonan di honor, incluyendo e CEO di Aruba Tourism Authority, Ronella Croes.
   E esfuerso colaborativo aki ta resalta e fuerte aliansa entre academia y industria turistico, y ta provee informacion balioso riba demografica di bishitante, comportacion di compra, patronchi di uzo, nivel di satisfaccion y consideracionnan di sostenibilidad cu ta yuda pa tuma decisionnan informa pa e sector di timeshare di Aruba.

   E encuesta di bishitante a revela e composicion di huespednan di timeshare: e mayoria grandi (93%) di bishitantenan/doñonan tabata di Merca, 4% di Canada y 3% di otro lugarnan di origen.
   E estadonan principal di Merca cu ta alimenta e mercado tabata New York, Massachusetts, New Jersey, Florida y Connecticut. Ora a pregunta riba satisfaccion y lealtad, e nivel di satisfaccion tabata hopi halto, cu mas di 90% expresando cu nan tabata hopi contento pa bolbe Aruba. Anto esnan cu a bishita e isla mas cu dies biaha, un lealtad fuerte demostra aki pa 80%.
   E encuesta tambe a establece e perfil financiero di bishitanten di timeshare: 80% di e respondentenan tabata tin un ingreso anual mas cu $100.000, y un parti considerabel (31%) tabata doño di un timeshare di dos siman. E mayoria di e bishitantenan lo keda entre 8 y 14 anochi riba e isla.

   Motibonan pa bolbe Aruba: Tur studiante a reporta cu nan tabatin conversacionnan largo y agradabel cu bishitantenan, cu a comparti nan motibonan pa bolbe e isla na 2025:

(*) Nan tabata considera Aruba como un destino di vacacion di calidad halto.

(*) Nan tabata aprecia e ubicacion fisico di nan resort.

(*) Nan tabata sinti un deseo specifico pa bolbe na nan mes resort.

(*) Nan tabata completamente satisfecho cu e experiencia general di e resort.
   Entre “extremadamente satisfecho” (50,9%) y “hopi satisfecho” (33,1%), bishitantenan a describi un experiencia hopi agradabel, demostrando e atraccion duradero di Aruba y su capacidad den loke ta e industria pa mantene standard di calidad halto durante dos decada largo.

   Entre e temanan investiga, e studiantenan tambe a encuesta e prijs di compra di timeshare, e strategianan di mercadeo, costo di mantencion, gasto di destino, expectativa y percepcion ambiental.

   Como conclusion di nan estudio, e studiantenan a logra identifica e tres puntonan atractivo principal cu ta trece bishitante bek nos isla tur aña:  e amabilidad y calor di hende di e isla, e beachnan bunita, y un clima semper confiabel.

   E resultadonan solamente a mustra un percepcion relativamente abou den un area: sostenibilidad y conservacion ambiental. Nan a duna maneho di awa residuo y esfuersonan di reciclahe un calificacion apenas un poco riba mitar (56,1%), compara cu otro aspecto, manera area natural y marino, cu a ricibi un cualificacion mas halto. E studiantenan a conclui nan presentacion cu un advertencia: si no tene preocupacionnan ambiental na serio y actua riba esakinan awor, Aruba ta bay den riesgo di daña su imagen. Actua awor por proteha confianza y reputacion, ta algo cu nan a agrega seriamente.
   Percepcion di seguridad: Pa loke ta e ultimo punto di e encuesta, bishitantenan mester a evalua nan percepcion di seguridad.  Di 7 pregunta riba seguridad, e pregunta cu a haya e puntuacion mas abou (50,9%) tabata tocante maneho di beach of centro di ciudad den un manera cu ta preserva seguridad.

   E puntuacion mas halto, 93,7%, a bay p’e pregunta cu a evalua  seguridad den areanan turistico popular.

E studiantenan a agrega na nan conclusion ta cu percepcion di seguridad ta un factor clave cu ta impulsa confianssa, lealtad y bishitanan repetitivo. E parti di confianza ta na riesgo, nan a adverti, si no tuma e area debil aki na serio.

   Asociacion ATSA a wordo estableci na 1994 y actualmente ta conta cu miembresia activo di mayoria di propiedadnan di vacation ownership na Aruba. E asociacion ta traha na nivel local hunto cu entidadnan gubernamental. Na nivel regional, unda Aruba ta sigui ricibi reconocemento manera un destino modelo pa vacation ownership, ATSA tin laso profesional y ta beneficia di colaboracion continuo cu ARDA, American Resort Development Association.  Miembronan di Hunta Directivo di ATSA ta: Sulaika Kelly, President; Rina Geerman, Secretario; Pedro Vargas, Miembro di Hunta; Jurgen van Schaijk, Tesorero; y Luigi Heredia, Miembro di Hunta.