Studiantenan di Facultad di Hospitalidad y Turismo (FHTMS) cu invitacion na comunidad pa sostene nan eventonan special

ORANJESTAD (AAN)" Studiantenan di Universidad di Aruba (UA) facultad di Hospitalidad y Turismo (FHTMS)

como parti di nan curso di “Events Management” a presenta nan ideanan y lo ta organisando ocho projecto pa nos comunidad den luna di april y mei.

            E projecto ta un ehercicio cu ta permiti e ocho (8) team nan di studiante aplica e conocimiento acumula di e teoria pa planea, organisa, y ehecuta un evento special pa recauda fondo pa un instancia den nos comunidad. E meta di e projecto “Special Fundraising Event” ta pa desaroya e conocimiento y abilidadnan di e studiantenan, pero mas aun motiva y involucra nan pa duna bek na nos comunidad.

            Den e auditorium di UA e gruponan a presenta nan idea / concepto na representantenan di ATA, AHATA, CEDE Aruba, ECO DMS, Setar N.V.  entre otro y representantenan di diferente instancianan cu nan lo ta yudando. Nan presentacion a inclui informacion di e instancia, motibo dicon a scohe esaki, tipo di evento, con lo mercadea e evento, recursonan cu mester pa ehecuta (voluntario, cuminda, fondo, y mas). E meta tras di e presentacion tawata pa nan ricibi feedback ariba nan evento for di e expertonan di industria y ricibi sosten pa por ehecuta esaki.

            “Cu e projecto kier logra pa e studiantenan pone den practica locual cu nan a siña durante e semester. Organisa un evento no ta algo facil, ta rekeri abilidadnan manera flexibilidad, creatividad, originalidad, bista pa detaye, initiativa, maneho di tempo, comunicacion, resolucion di problema y mucho mas. E meta adicional ta pa stimula mas voluntario pa nos comunidad.” Sra. Jo-Anne Croes docente di e curso ta subraya.

            Ta invita pueblo di Aruba pa bishita e diferente eventonan y sostene nos studiantenan cu ta trahando duro y di curason♡ pa nos comunidad.

            Facultad di Hospitalidad y Turismo di Universidad di Aruba ta reconoce e contribucion unico y strategico di e industria di turismo pa e desaroyo di Aruba y Caribe. Pa mas informacion di nos programa por bishita nos na www.ua.aw of via facebook @UA.FHTMS