Stichting Bernhardstraat a keda oficialmente estableci

ORANJESTAD (AAN): Un momento significativo a tuma luga ora representantenan di Stichting Bernhardstraat a firma oficialmente, dilanti notario, e acta pa bira formalmente un fundacion.

Segun presidente John Hassel, e formalisacion aki no ta solamente ta un paso legal, pero un declaracion cla di e compromiso pa traha activamente na beneficio di San Nicolas y e Bon Comun.

“Una bes bo bario ta bira bunita, hende ta comunica mas cu otro, nan ta yuda otro y nan ta involucra nan mes mas,” Hassel a indica.

E vision di Stichting Bernhardstraat ta enfoca riba embeyecimento y renobacion di e area rond di Bernhardstraat, incluyendo restauracion di fachada di edificio y colaboracion cu contratistanan, sponsor y boluntarionan pa duna e bario un aspecto renoba.

Un ehempel menciona tabata e mural na Chocolate City cu lo honra Julio Bernardo Euson, como simbolo di con arte y identidad cultural ta fortalece orguyo comunitario. Segun Hassel, ora un area fisico ta mehora, e impacto social ta sigui automaticamente.

E iniciativa ta forma parti di un movemento mas amplio den San Nicolas, caminda organisacionnan local ta tuma liderazgo pa revitalisa nan propio area, den linea cu e espirito di Bon Comun, promovi durante e conferencia.

Cu e firma oficial dilanti notario, Stichting Bernhardstraat a marca e inicio di un etapa nobo, caminda colaboracion, creatividad y compromiso comunitario ta central pa crea un San Nicolas mas bunita, mas uni y mas dinamico.