Speranza pa cambio ta keda den e muchanan

Segun Rubiella Toppenberg di FADA:

ORANJESTAD (AAN): Fundacion Anti Droga Aruba (FADA) ta sigui cu campañan di conscientisacion di no bebe y stuur y ya a drenta scolnan rond di Aruba cu e programa Carousel enfocando riba Carnaval y alcohol. Pa loke ta trata medionan social, Rubiella Toppenberg di FADA, a menciona cu esakinan tambe lo ta dorna cu informacionnan di campañan di conscientisacion. Y Bo Amigo Responsabel (BAR) lo ta presente den actividadnan di Carnaval, riba entre otro pantayanan den parada.

   “Campañanan di conscientisacion ta eyfo, e informacion ta eyfo. Ta keda den man di ciudadanonan pa tuma e decision responsabel y percura pa un amigo responsabel pa stuur y hiba nan cas”, señora Toppenberg a enfatisa den un entrevista recien cu DIARIO.

   Sinembargo, Toppenberg a menciona cu e speranza ta keda den nos muchanan. Na momento cu Fada acerca nan na scolnan cu programanan atractivo manera Carousel y BAR, nan ta hopi consciente di loke Fada ta conta nan. Di otro banda, e muchanan tambe ta conta hopi cos cu ta trece asombro y tambe preocupacion.

  Segun señora Toppenberg, door cu nos muchanan ya ta mira hopi cos cu ta sosode relaciona cu stuur y uzo di alcohol, y e campañanan di conscientisacionnan cu ta yega cerca nan, nan lo crece pa ta e cambio. Esaki ta pasa tambe den nos hobennan cu a ricibi e mensahenan di conscientisacion desde nan ta mucha, y awo nan ta consciente y ta tuma turno pa ta BAR ora nan sali den grupo.

  Na final di dia, Toppenberg ta enfatisa, si bo ta bebe, no stuur. Esaki ta keda e mensahe di FADA, especialmente den e temporada di Carnaval.