Sorpresa ora cu algun Stemlokaal a prohibi ‘hobennan special’ di vota

Hoofdstembureau a core soluciona esaki

ORANJESTAD (AAN): Un situacion inespera a presenta su mes na Stemlokaalnan 25 (Scol Prinses Amalia), Stemlokaal 32 (Colegio Conrado Coronel), y Stemlokaal 35 (Maria Goretti College), unda na un forma sin base, e comision no kier a laga hobennan cu ya a cumpli 18 aña bay vota, djis debi cu nan ta cay bao di “muchanan special”.

   Esaki ta un golpi duro pa e lucha grandi di “Inclusion”, cu Gobierno y tur partido politico a papia riba dje sin fin.  Pero ora cu e momento a yega pa Aruba mustra cu a drenta e epoca nobo unda tur hende ta igual, ata nan a lanta obstaculo grandi.

   Mesora a cuminsa mobiliza pa varios activista cuminsa check si enberdad hendenan cu discapacidad ta wordo discrimina door di ley di eleccion.  Aparentemente tin nada poni ningun caminda riba esaki.  E problema a bay cay te den scochi di Hoofdstembureau, cu rapidamente a contesta cu e hobennan aki SI por vota numa den eleccion.

   Un di e hobennan cu sindroma di Down cu a bay vota mesora tabata Jake, kende a haci hopi practica con pa e entrega su oproepingskaart, con el a habri e stembiljet, y vota riba su candidato faborito.  Despues el a dobla e papel y aki por mire ta pone su voto den e buzon.

   Aunke Jake tabatin suerte, un otro hoben cu sindroma di Down, esta e dama hoben Desi a bay 3x bek na e Stemlokaal.  Pero e president a keda insisti cu e no ta permiti hobennan aki bay vota, pasobra a haci pregunta na Desi.  E hoben aki ta bira nervioso hopi liher, y ta gago tambe, y pesey no por a contesta bon.  Pero e tabata bon entrena con pa bay vota, con ta dobla e stembiljet y tur cos mas.  Pero e no a haya chens, y esaki a bira un nubia scur riba tur e logronan di ‘Inclusion’ ultimo añanan na Aruba.

   Riba potretnan por mira Jake ta depositando su voto, y e otro potret ta e dama hoben Desi cu su oproepingskaart na e Stemlokaal unda nan a rechaza inhustamente su derecho di voto.