SNBA a reuni cu Comision den Parlamento tocante su vision pa San Nicolas

Errol de Freitas, Presidente di SNBA:

ORANJESTAD (AAN) Den entrevista cu DIARIO, señor Errol de Freitas, Presidente di San Nicolas Business Association (SNBA), a elabora tocante e reunion cu e asociacion a sostene cu e Comision den Parlamento, tocante e desaroyonan pa San Nicolas.

   De Freitas a splica cu tur esaki a cuminza ora SNBA a presenta su vision pa San Nicolas, cual ta den cuater area, cu ta: caya principal, Colony, resto di comunidad y refineria.

   “Kiermen, nos a mustra con tur esaki ta bin hunto den uno. Den esaki ta djis mi ta trece dilanti e aspecto comercial; e progreso comercial di San Nicolas, cu nos tin cu atende mesora cu e aspectonan social cu San Nicolas tin. Pero locual nos ta ripara y ta trahando riba dje ta cu nos tin cu cuminza drecha e problemanan social, prome cu bo bay hasta ataca esnan comercial, pasobra, nan Ingles nan ta bisa ‘nan ta twin di otro’. Pasobra eynan comunidad ta bay, anto nan ta bay den comercio haci compras, anto esaki ta bay man den man di otro, y si nos ripara un di e aspectonan di mas importante di un comunidad, ora socialmente nan ta feliz”, Errol de Freitas a subraya.

De Freitas ta puntra: cual yiu di tera no kier ta doño di su mesun cas? El splica cu locual SNBA ta haci ta, cu e experticio cu kizas no tin full den nos propio cas, nan ta buske di pafo, pero akinan na Aruba mes. “Nos ta papiando di casnan cu ta pagable; no ta casnan social sino casnan cu por traha cu por traha cu miho material. Anto nos ta busca un compania real, cu ta pasando den un situacion na Aruba”, de Freitas a menciona.

   El a trece dilanti un escenario cu nan a presenta dilanti e comision den Parlamento, por ehemplo un ciudadano cu ta biba di salario minimo, por ehemplo 2000 Florin, pero ta wordo bisa cu e bestand minimo ta 5.500 Florin, cu ta halto. “Si bo tuma 1% di nan salario, anto e werkgever ta pone 3% di su salario, p’e mester ta deducible cu e por declar’e na Impuesto. Si tuma e airbnb, cu no tin un fin p’e ainda, entre otro fondonan, cu por bira un pot, y por bira interesante, pa e ciudadano por tin e 25% cu por yega na e deposito di e cas”, De Freitas a remarca.