SMAC y Setar NV a detecta cu tin konkelmento for di Asia votando na gran escala pa reinanan di Aruba

Hende a paga pa robotnan vota pa reina na Aruba

• Awor ta filtrando tur e votonan falso di Bots afo 

ORANJESTAD (AAN): E siman aki a bira conoci, cu esnan di Organizacion SMAC y tambe tecniconan di IT di Setar NV, cu ta funcionando cu e sistema di Pay.aw ta riparando cu e votamento di ‘Likes’ online pa mira kende ta bay cu e premio di “Queen of Pay.aw” (conoci antes como Queen of Setar), ta haciendo un trend hopi raro.

   Riba Social Media bo ta like of reaccion (pone bo emoticon), y asina bo ta vota pa bo reina preferi.  Pero e ta bay hunto cu e cantidad di carchi cu cada reina a bende via Pay.aw.

   Pero como 3 dia pasa, a constata algo ta pasando y mesora a dicidi na actua.

   Riba Social Media, si bo mira cierto candidata cu ta participando, tin un monton di likes cu ta bin di profil accountnan di Facebook cu ta hopi raro, mayoria di nan ta asiatico e.o. China y Hong Kong.  Esnan di Pay.aw tambe a ripara esaki, y a bin descubri cu hopi di e IP Address di esnan cu a vota ta procedente di Lejano Oriente.

   Diabierna atardi durante e programa ‘Candela’ di Ivo Yanez na Canal 90 FM, tanto Larissa Bermudez di SMAC y tambe Julissa di Setar NV, a confirma cu nan a detecta e actividad inusual aki den e votamento.  A mustra cu mesora a ripara cu un of mas hende lo ta haciendo uso di ‘Reaction Bots’ cu ta acumulando ‘Likes’ na monton pa un solo reina.

  Con nan ta funciona: En general bo ta paga pa un servicio di “Bots”, cu asina ta funciona cu computer- of tabletnan na monton instala instala (mira e potret) den salon of depositonan rond mundo (pero principalmente na paisnan Asiatico), cu ta actua como accountnan falso, cu ta actua comosifuera nan ta un humano cu ta duna voto.

   Bo por paga kizas 5 Dollar, y bo ta garantiza cu pa Diabierna bo tin 100 extra “curazon” riba e pagina di e candidata cu bo kier promove.

   Problema ta cu ora bo bay mira e potret di e candidata, y mira kendenan a “vota” pe, bo ta bin topa cu yen di profil straño, yen di nombernan Asiatico cu no ta bibando na Aruba.  Esaki ya ta mustrabo cu esey no ta un voto valido, sino e ta un “voto cumpra”.

   E team di Pay.aw tambe a reacciona rapido riba esaki, y nan tin hasta un Software special traha cu ta importa tur e Likes riba Social Media, y e ta ‘filtra’ tur e votonan falso aki pa asina dunabo un cifra real.

   Pues tin un of mas hende cu lo a saca placa y “paga pa Bots” bay basha likes y reaccion pa loco riba un candidata cu e speranza cu e lo haya mas voto cu tur, pero ta saliendo na cla awor cu mayoria di nan ta di computer robots (yama tambe ‘Bots Farm’) cu tin plama rond di Asia y cu ta votando pa loco pa e reina.

   Siendo cu e robotnan aki cu a vota pa e reina, no sa mes unda Aruba ta situa!

   Segun Bermudez a splica, e team di SMAC y tambe Pay.aw tin 3 dia ta vigilando esaki, y nan lo bay elimina tur voto falso di “Bots”.  Comision di Reina ta na altura di e situacion, y ta sigui vigila y lo bay filter tur Likes riba Social Media na ultimo momento pa asina percura pa esun cu gana e Premio ey lo ricibi esey na forma husto, caminda tur voto falso a wordo elimina.

   Pues e candidata cu sali kizas no ta e persona cu tin monton di Likes riba su potret.

   Kende a paga pa e Bots aki?  Esey ta algo cu no por bisa.  E por ta famia of amigo di e candidata cu kier a haci algo.  Pero e por ta tambe cu otro hende ta haci esaki djis pa perhudica un candidata.

   Pero Pay.aw ta controlando tur dia pa filtra tur e lista pa saca votonan falso di Bots afo.