Situacion na e pais a pone famia na Aruba cancela nan biahe di vacacion na Panama

ORANJESTAD (AAN) – Manera por a lesa den DIARIO, den nos edicion di Dialuna 25 di Juli aki, Panama ta bibando un situacion di disturbio masha preocupante,

y blokeo di trucknan cu ta transporta producto pa e ciudad, y violencia riba caya, cu ya caba a genera hasta hende herida, desabastecimento di alimentonan, fruta, berdura, lechi, etc., ta incontrolable y e protestanan riba caya, dialuna mes tabata sumamente serio.

Na Aruba tin diferente persona cu tin amistad of famia na Panama y nan gusta bay pasa vacacion grandi aya hunto cu nan famia y di un famia mes, DIARIO a haya informacion cu nan tabata tin planea pa e ultimo siman di Juli biaha pa Panama, pa keda un diez dia, pero mirando cu e disturbionan tin tres siman caba, y cu supermercadonan y otro establecimentonan ta bashi, nan ta asumi cu hotelnan tambe lo ta pasando den problema di scarcedad di alimento, y ademas nan no ta descarta cu por tin peligro pa e bishitantenan mes, door cu e pueblo ta furioso riba caya, segun nan a wordo informa. Asina ta cu nan a cancela nan viahe pa Panama, locual e famia ta lamenta masha, pasobra nan ta gusta e pais pasobra e tin hopi ambiente, bunita lugarnan pa bishita, e hendenan ta hopi alegre y hasta e lugarnan unda ta presenta folklore panameño nan ta gusta bishita y goza di dje.

E situacion a surgi, manera DIARIO mes ta trece dilanti den edicion di dialuna, door di e costo di bida hopi halto y tambe e combustible cu a bira impagable. Esaki ta un situacion cu otro paisnan di America Latino tambe conoce, y mester di berdad reza y pidi Dios hopi pa paz na mundo, y cu no surgi confrontacion na otro paisnan y tampoco den nos region. Segun un ex-colaborado di DIARIO e peligro cu Panama ta enfrentando aworaki, ta cu por surgi un revolucion di pueblo contra pueblo. Ohala, e lo no yega asina leu.