Siete y 6 aña di prison pa duo Venezolano haya culpabel cu 4 hende a hoga durante traficacion di hende

Caso di cadavernan cu a drief yega Vader Piet

ORANJESTAD (AAN): Diabierna mainta Hues di Corte Den Promer Instancia a dicta sentencia den e caso penal cu Ministerio Publico a cuminsa contra dos Venezolano. E hombernan Venezolano Y.J. Rodriguez y E.J. Diaz Sanchez, a worde haya culpabel di e tragedia cu a sosode na December 2023 caminda 4 hende a hoga.

   Tratamento di e caso tabata na December 2024, caminda Fiscal ta acusa Y. Rodriguez y E. Diaz Sanchez cu entre 1 December 2023 y 11 December 2023, a haci traficacion di hende y cu door di e hecho aki tres of mas hende a bin fayece riba laman.

   Fiscal a exigi 7 aña: Fiscal a bisa cu Y. Rodriguez tabatin un funcion importante den e organizacion y E. Diaz Sanchez tabata e capitan.  Den su requisitorio dilanti Hues, el a exigi 7 aña di prison pa tur dos.

   Sentencia: Hues a bisa cu ambos ta worde condena pa traficacion di hende caminda 4 hende a hoga. Hues ta haya cu di un forma of otro, Y. Rodriguez y E. Diaz Sanchez, a duna aporte significante pa e traficacion. Hues ta haya cu tin suficiente prueba cu Y. Rodriguez a manda placa y duna conseho cual tipo di boto mester busca.

   Tambe Hues ta haya cu Y. Rodriguez a percura pa hendenan na Venezuela worde hiba na e boto pa bin Aruba. Hues ta haya cu E. Diaz Sanchez a maneha e boto hunto cu un otro durante e trayectoria pa Aruba. Tambe cu E. Diaz Sanchez tabata percura pa yena tanki di gasoline for di bari pa e boto por nabega.

   Hues a bisa cu e no ta haya cu nan tabatin intension pa kita bida di hende durante e traficacion. Hues a bisa cu tabatin peliger di morto durante e traficacion. Na opinion di Hues, for di e investigacion, no ta mustra cu e duo Y. Rodriguez y E. Diaz Sanchez, a haci e traficacion pa gana placa.

   Culpabel di traficacion: Hues a bisa cu e ta haya nan culpable di traficacion di hendenan. El a bisa cu e caso ta hopi serio door cu 4 persona a perde nan bida. Na opinion di Hues, traficacion di hende ta haci violacion grandi riba orden publico.

   Tambe e ta contra e maneho estableci pa Gobierno pa hendenan drenta Aruba. Hues ta haya cu door di esaki, ta mantene un cirquito di hendenan ilegal pa Aruba.

   Castigo di Hues: Pa cu e castigo, Hues a bisa cu e ta tene cuenta cu seriedad di e caso y sentencianan cu sa duna pa casonan similar. Pa cu Y. Rodriguez, Hues a tene cuenta cu su funcion den e organizacion di e viahe. Hues ta haya cu Y. Rodriguez a duna informacionnan valioso entre otro ki tipo di boto mester busca, busca un capitan y manda placa. Di otro banda, Hues a tene cuenta cu dos hende serca di Y. Rodriguez su famia, a fayece durante e viahe. Esaki a causa un impacto fuerte riba e famia.

   Pa cu E. Diaz Sanchez, Hues ta haya cu e acusado aki a dicidi di bay cu e boto siendo cu e sa cu e boto no tabata apto pa haci e viahe y laman tabata bruto. Hues a bisa cu durante e viaha, D.S. tabata percura pa gasoline pa e motornan. Hues tambe a tene cuenta cu E. Diaz Sanchez mes a forma parti di e viahe y a pone su mes tambe na peliger.

   Hues a condena Y. Rodriguez na 7 aña di prison y E. Diaz Sanchez na 6 aña di prison.