SICA ta organisa un simposio y lo enfoca riba trauma y su impacto den bida

Den conexion cu Dia Internacional di Hende Muhe

ORANJESTAD (AAN): Diadomingo 8 di maart ta Dia Internacional di Hende Muhe. Un dia cu mundialmente ta tuma tempo pa honra e sernan femenino pa su historia, fortalesa, perseverancia, sacrificio, contribucion y amor grandi cu nan ta duna no solamente na nan famia y sernan keri, pero sigur tambe, na e comunidad. Hopi organisacion, riba e dia aki of den conexion cu e dia aki, ta organisa actividadnan, eventonan y charlanan entre otro, cu temanan al caso y importante pa conscientisa e ser muhe riba nan importancia y balor. 

Den un entrevista cu DIARIO,  Magaly Maduro, Presidente di Soroptimist International Club Aruba (Sica), a conta di e simposio special di Sica cu e aña aki ta dedica na sanacion, consciencia y transformacion. E tema general di e simposio lo ta trauma. Tin conversacion cu no ta facil. Pero nan ta necesario. Si nos no sana loke nos ta carga paden, nos ta pasa esaki pa e siguiente generacion. Y si nos tin balor pa confronta, nos por cambia e historia.

E simposio lo tuma luga diasabra 7 di maart 2026, di 10:00 di mainta te 2:00 di atardi, na Space 67, Educampus. E simposio lo ta totalmente gratis den un espacio sigur unda participantenan por papia cu sinceridad tocante trauma, patronnan intergeneracional y e caminda pa sanacion.

Lo tin tres orador cu hopi experiencia riba e tema cu lo comparti e mensahe di conscientisacion den un manera interactivo. Señora Clementia Eugene lo papia riba Trauma Intergeneracional, señora Sueli Kelly-Quant lo trata e tema Compronde Trauma, y señora Geraldine Lacle lo cera e programa cu un Activacion di Siguridad Interno.

Den nomber di Sica, señora Maduro ta invita tur hende muhe en especial pero tur ciudadano en general, na e simposio diasabra 7 di maart.