Si e tin gana of no, minister Glenbert Croes mester responsabiliza su mes den Parlamento

Marisol Lopez Tromp: ---*Parlamento ta hefe di e ministernan

ORANJESTAD (AAN): Parlamentario Marisol Lopez Tromp recientemente a indica cu pa fraccion di MAS ta inaceptable cu minister Glenbert Croes no kier bin responsabiliza su mes den Parlamento, despues cu MAS a manda un peticion pe, despues di e sentencia cu el a haya di huez (‘voorlopige voorziening’), den e caso cu e tin cu director di Dimas Kathy Ruiz Paskel.

Esaki el a indica durante un conferencia di prensa.

“Manera tur hende sa, huez a dune un sentencia cu como minister a lage na werki, pa loke ta e procedura huridico”.

Ta mustra cu en todo caso minister a haci e stapnan cu el a tuma den un forma robez y como minister di tanto aña den e trabao aki, ta hopi straño ma nos cu bo ta efectua pasonan cu ta hala un hende un banda y pa di dos pa hacie den e forma incorecto, contra ley, contra constitucion, contra landsverordening instelling ministeries, manera cu el a haci, segun Lopez Tromp.

E parlamentario di MAS a sigui bisa cu e fraccion despues di e sentencia a pidie pa e bin Parlamento, pa duna un splicacion riba e consecuencianan cu e ‘vonnis’ aki tin.

“Consecuencia por ehempel pa Dimas y pa e proceduranan diario den Dimas”.

Nos kier sa kico a cambia despues cu el a ricibi e sentencia aki, pasobra pueblo ta acudi na Dimas tur dia pa nan peticionnan y nos kier tin claridad riba e consecuencianan di e hecho cu huez a suspende su decretonan ministerial, segun e parlamentario, kende a sigui bisa cu minister Croes no a duna oido.

A manda un prome carta na inicio di Juni y e mandatario no a contesta.

Lopez Tromp a bisa tambe cu despues fraccion di MAS a manda un asina yama ‘rappel’ riba 21 di Juni, caminda cu e minister a wordo pidi pa bin e reunion publico na Parlamento.

“Manera boso sa, e minister mester responsabiliza su mes ora cu nos pidie esaki”.

E presidente di Parlamento dentro di tanto dia mester yama e reunion y den e rappel aki cu nos a manda pe, nos ta splica hopi cla cu e mester bin Parlamento.

Como minister bo no por bisa cu bo no tin gana.

Bo mester bin anto aki den splica loke bo kier bisa, segun e parlamentario di MAS.

El a sigui bisa cu segun constitucion, Parlamento tin e derecho di haci tur e preguntanan cu nan tin, pasobra ta Parlamento na hefe di Gobierno, pasobra e tin cu controla e trabao di Gobierno.

Segun Lopez Tromp, ta bay manda un di dos rappel pa e minister y un copia ta bay wordo manda pa Gobernador.