Sesionnan cu ACF ta brinda ta pa henter comunidad

Director di ACF, Tyson Lopez:

*Ta importante pa docentenan tambe participa 

ORANJESTAD (ANN)-- Director di Aruba Conservation Foundation, Tyson Lopez a enfatiza, den entrevista cu Matutino DIARIO, cu pa ACF ta importante pa hisa e conscientizacion riba e importancia di yerba di lama, pasobra door di e recreacion cu ta pasando riba costa ta pone su impacto riba yerba di lama, pasobra tin hende ta cana, boto ta bira anker y ta importante pa hisa e concientizacion, pa tur hende compronde e importancia di esaki.

“Esaki ta pa tur hende, pa comunidad, no ta dirigi pa un grupo specifico, pa esnan cu ta bay lama, y si bo no ta bay lama mes, ta importante pa compronde el balor di e yerba di lama”, Tyson Lopez a reitera.

E ta haya importante pa docentenan participa den e sesionnan cu ACF ta brinda. “Nos tabata tin cinco sesion (cinco tema) caba, y nos ta haci dos of tres sesion pa cada tema, cu hopi hende ta atende. Tin hopi comentario, hopi idea, y hopi preocupacion ta bin di comunidad, p’asina nos tin idea di kico ta pasando eyfo”, señor Lopez a señala, agregando cu nan tin encuentro den bario, pero nan no ta yega na un masa grandi di hende. “Nos ta desaroyando nos programanan di educacion pa tanto na scol pero tambe pa turismo. “Den e acuerdo cu nos a firma ultimo cu ATA, ta papia di un programa di certificacion pa tur operadornan, tanto terestre como marino. Akinan nos ta bay adresa, e ora ey, pa concientiza tur operador cu ta haci uso di dje. Asina bo ta yega un grupo mas grandi, y tambe p’asina continua cu e trahadornan di hotel. No tur ora ta bay pa cambio di comportacion, pero pa concientizacion pa nan splica hende. Si nan wak un local of un turista haci cierto cosnan, ya bo sa locual bo por bisa”, director di ACF, Tyson Lopez a conclui.