Señora Omaira Britten ta cumpli 50 aña skirbiendo poesia

El a cuminsa na ora DIARIO a habri porta p’e

ORANJESTAD (AAN): Poesia ta un bati di curason di mas bieu di humanidad. E ta duna bos na amor, tristesa y speranza, ta yuda crea empatia y ta preserva memoria, uniendo bida individual cu experenianan comparti. Poesia ta recorda nos ken nos ta. 50 aña pasa, señora Omaira Britten cuminsa skirbi poesia pa pueblo cuminsando na Matutino DIARIO.

   E tempo ey, señora Britten ta conta, señor Jossy Mansur (dfm) a habri porta pa e desaroya e don special cu el a ricibi for di Papa Dios remarcando cu su inspiracion pa skirbi y su mensahenan ta bin di ariba, y tur loke e skirbi mayoria biaha ta sali manera e situacion tabata ora un hende fayece.

   Señor Mansur desde e tempo ey, a permiti señora Britten publica su poesia por nada den DIARIO y e tampoco ta cobra niun hende cu ta pidi’e skirbi poesia pa nan manera segun e, Señor a revela na dje pa no cobra pa e don ricibi.

   Señora Britten a conta cu despues cu su tata a fayece, el a rabia y cuestiona Papa Dios pakico el a kita su tata for di dje. Despues di 2 aña cu su tata no tey mas, señora Britten a sinti cu Papa Dios a papia cu ne sinembargo, ta te despues di tres aña el a skirbi su prome poesia dedica na su tata. E poesia aki cu a sali for di su curason, tabata un mensahe pe mes, na unda el a ricibi e don cu ta bise’e kico e tin pa bisa y haci.

   Señora Britten, durante e añanan cu a pasa, a haya hopi peticion pa skirbi poesia. Y ta corda e impacto cu hopi di nan tabata tin, na unda cu e tabata skirbi exactamente loke a pasa den bida di esnan pa ken el a skirbi.

   Segun señora Britten, ora cu e ta encontra hende cu e ta sinti cu tin falta di un palabra inspirador, e ta acerca nan y ta papia cu nan. Segun e, e ta haya inspiracion te hasta den oranan di madruga. Cu su poesianan e ta alegra ciudadanonan riba Dia di Mama, Dia di Tata y riba otro fechanan importante. Y nunca e ta cobra, pasobra manera el a expresa, “Ora bo haya un don di Señor, pa hiba Su nomber y palabra cerca e pueblo, bo ta duna e mesun cariño ey cu bo a haya, pornada”, señora Britten a expresa.

   Su regalo of pago, e ta bisa, ta ora cu hende top’e un caminda y ta salud’e, bras’e y bis’e cu el a skirbi un poeisa nan nan. Esey ta alegra su dia.

  E mensahe cu señora Britten ta laga atras pa esnan cu kier skirbi poesia ta: “Sinta, papia cu Papa Dios y mustra cu bo por pasobra nos tur a nace cu un don. Si bo ta sinti di curason cu bo kier skirbi poesia, hacie sin tene berguensa ni miedo pasobra hende no ta bay yuda bo, ta e don di Papa Dios cu bo a nace cu ne, bo mester desaroya y lo por cambia bida di otronan”, señora Britten a expresa.