Segun rapport di IVA, Fragmentacion den cuido di salud mental ta causa riesgonan grandi den cuido

Carolina Thiel Span di Inspeccion di Salud Aruba:

ORANJESTAD (AAN): Salud mental ta un topico di hopi importancia. Salud mental ta cay bou di cuido medico. Inspeccion di Salud Aruba (IVA), un organisacion relativamente nobo,  tin un rol grandi pa controla y salvaguardia e calidad di cuido y siguridad di pashentnan.

Señora Carolina Thiel-Span, den un entrevista recien a remarca cu IVA, na aña 2024 a cuminsa un investigacion riba e veld medico na Aruba pa crea un imagen di e situacion na Aruba pa locual ta trata cuido di salud mental. A haci un nulmeting pa haya miho bista con e parti medico aki ta hinca den otro na Aruba y kico ta e riesgonan pa Aruba y cua ta e areanan cu tin mester mas atencion pa asina evita situacionnan indesea of posibel calamidadnan.

Den e investigacion a purba entre otro di identifica dunadornan di cuido di salud mental na Aruba entre otro psikiatra, psicologo, psicoterapista, ortopedagogo y organisacionnan cu ta emplea e grupo aki, y docternan en general. Esaki a duna claridad riba con e veld na Aruba ta traha den e sector aki. Señora Thiel-Spam a indica cu rapport aki, dunadornan di cuido di salud mental, por sa unda pone mas atencion pa evita y of pa metiga e riesgonan aki.

El a remarca cu pa hopi tempo no tin un linia di maneho cla cu ta facilita e trabou di dunadornan di cuido di salud mental. E sector aki ta uno fragmenta door cu tin hopi linia y diferente forma di duna e cuido aki, entre otro, tin personanan cu ta traha nan so y otronan den organisacionnan. Tin ta haya subsidio y tin cu ta cubri door di AZV y otronan completamente priva. E fragmentacion aki, segun señora Thiel-Span, ta haci cu e nivel di cuido por varia y ta haci desicionnan cu ta basa riba kico nan por paga, entre otro material di test cu ta costa placa.

Segun e, un recomendacion den e rapport di IVA ta, cu mester bin un linea. Sinembargo, no ta e rol di IVA pa crea e linea aki . El a menciona cu nan rol ta pa haci control y investigacion y indica unda tin riesgo. Despues cu a haci e investigacion recien aki, IVA a avisa e veld di cuido medico y e personanan encarga, cu mester percura pa trece e mehoracion. “Pero nos mester di un linea, nos no por keda traha fragmenta pasobra e riesgonan ta bira den situacionnan real indesea ora cu personanan cu salud mental no ta haya e atencion y cuido necesario for di e persona corecto”, señora Thiel-Span a duna di conoce.

gallerySegun rapport di IVA, Fragmentacion den cuido di salud mental ta causa riesgonan grandi den cuido/gallery