Segun Minister Geoffrey Wever no lo tin inflacion den 2025 na Aruba

ORANJESTAD (AAN):  Minister di Finansa, Asunto Economico y Sector Primario Geoffrey Wever ta elabora riba e expectativa pa inflacion y e desaroyo actual di e indice di prijs di consumo (CPI) pa 2025.

E CPI ta midi e cambio promedio den prijs riba mercado di un canasta di productonan y servicionan cu consumidornan ta paga. Oficina Central di Estadistica (CBS) ta publica tur luna e desaroyo actual di e nivel di prijs y no ta haci proyeccion pa loke ta spera di inflacion.

            Departamento di Asunto Economico, Comercio y Industria (DEZHI) ta publica dos biaha pa aña e “Economic Outlook” cu ta contene e proyeccion economico. Parti di e analisis economico aki tambe DEZHI ta publica e expectativa pa e inflacion.

            Na final di 2024 DEZHI a proyecta un inflacion di 1.7 porciento pa 2025. Basa riba informacion disponibel riba desaroyo local y internacional, den luna di mei 2025 DEZHI a ahusta e proyeccion pa un inflacion di 1.9 porciento pa 2025. Den DEZHI su Economic Outlook 2025-2027 riba pagina 16 DEZHI ta duna un analis y ta premira un inflacion di -0.1 porciento pa 2025.

            Publicacion di CBS riba inflacion pa e luna di oktober ta mustra cu consumidornan a e experencia un inflacion di 0.2 prociento. Cifranan publica di CBS ta mustra cu desde 2022 den cual Aruba a conoce un inflacion di 5.5 porciento, pa 2025 e nivel di prijs di productonan y servicionan a baha considerabelmente. Basa riba e informacion publica di CBS, desaroyo internacional como e bahada den prijs di bari di petroleo y su impacto positivo riba prijs di gasoline y diesel y desaroyo local manera bahada di accijnzen riba gasoline y diesel desde 1 di mei 2025, DEZHI ta premira un inflacion di -0.1 porciento of “deflatie”.

            E nivel di prijs den un pais den un impacto directo riba e poder di compra di tur hende. Pesey banda di proyecto e inflacion ta monitor tur luna kico CBS ta publica cu tawata e inflacion. Como isla nos ta importa tambe inflacion y baha accijnzen riba gasoline y diesel como instrumento di e maneho economico di Gabinete AVP-FUTURO pa mitiga e impacto di prijsnan internacional riba nos nivel di prijs den economia segun minister Geoffrey Wever.

            Minister di Finansa, Asunto Economico y Sector Primario, Geoffrey Wever, ta gradici CBS pa e trabao di tur luna di publico e desaroyo di nivel di prijsnan na Aruba y ta invita un y tur pa bishita e website di CBS www.cbs.aw pa tur informacion detaya y oficial.