Scolnan na Aruba tambe ta kedando full cla pa temporada di Horcan

ORANJESTAD (AAN): Siman pasa oficialmente e Temporada di Horcan 2021 a cuminza, sinembargo ya desde 15 di Mei a cuminza pone un ‘watch’ pa e temporada.

   Rino Hermans di Rampenbureau Aruba, a indica cu ta bon mes cu a pone e watch ey desde 15 di Mei, pasobra pa di 7 aña consecutivo, ya prome cu e fecha oficial di Horcan, a nota cu un Tormenta Tropical a forma riba Oceano Atlantico.  E biaha aki Tormenta Tropical Ana a nace dia 22 di Mei 2021.

   Mientras tanto pa Aruba, varios plan a wordo traha pa 2021.  Segun Hermans, e.o. pa e Scolnan cu ta cay bao di SKOA, ya nan crisisplan ta kedando cla.  Esaki e ora lo bay pa Departamento di Obranan Publico, y despues bolbe bay bek.

   National Hurricane Center na Miami a pidi tur hende pa laga tur hende prepara den e piek di e temporada cu ta Augustus-September, esta cu unavez cu bo a train bo plan, bo a keda prepara tambe si bo topa cualkier eventualidad.

   Rino Hermans a splica cu na 2020 pa motibo di e pandemia, tabata confronta retonan pa yega na scolnan.  Pero e biaha aki si e ta riba nan rooster, esta cu di Februari caba e scolnan na Aruba ta trahando nan plan no djis pa horcan, sino pa diferente incidente cu por socede na scol.  Fundacion SKOA ta basta avanza den esaki, y awor Rampenbureau ta ocupa cu Scolnan publico di DPS y cu e Departamentonan di Gobierno tambe.

   Desde 15 di Mei 2021, Prome Ministro a duna instruccion na Rampenbureau pa prepara y revisa plannan di Departamentonan y pa laga sa kico mester, pa asina por ta cla pa e periodo di Horcan.  Y por a mira con hopi Departamento a yama Rampenbureau pa revisa nan plannan.

   “Pa temporada di Horcan nos ta full activo, y mi ta kere cu Coronavirus a duna un wake-up call pa henter comunidad Arubano nota cu ora un incidente socede cu magnitud grandi, bo mester ta prepara pe, sino bo no por deal cune,” Hermans a bisa.