Scol Dun’un Man y Colegio San Antonio ta ricibi donacion di Quota International of Aruba y TOB Carnival Group

ORANJESTAD (AAN): Quota International of Aruba y TOB Carnival Group a entrega earplugs y material di disfras na Colegio San Antonio y Scol Dun’un Man.

Ambos scol a acerca e dos organizacionnan aki pa un contribucion y a ricibi esaki tambe.

   Angelique Brouwer Vice President Qouta Club a duna di conoce cu Quota gustosamente a haci un donacion di 600 earplugs na e dos scolnan menciona. El a agrega cu Quota lo ta den e paradanan ta bende nan earplugs y ta encurasha pa mayornan acerca nan ora nan pasa y no laga nan yiunan wak e paradanan sin earplugs.

   TOB Carnival Group a haci contribucion di bandana y di sombre di cowboy. Señora Lisette di TOB a remarca cu Scol Dun’un Man a acerca nan pa e sombre di cowboy pa nan fiesta di Carnaval pero door cu nan no a resta niun, el a acerca varios participante pa pidi nan yuda e scol y a logra cera e cantidad cu e scol a pidi pa e muchanan. Participantenan a pasa laga esakinan y deposita nan den un caha na New India Assurance.

   Pa Colegio San Antonio, TOB a logra un caha di bandana tambe. Señor Gershwin Lee Colegio di San Antonio a remarca cu nan scol kier bay bon prepara na e parada escolar 6 di februari proximo. Y pa level up nan participacion, a pidi donacion di bandana na TOB y pa haci e muchanan consciente din an oido, nan a pidi donacion di earplugs na Quota Club.

   Señora Jeannise Boekhouwer di Scol Dun’un man a expresa cu e lidernan di scol a keda encanta cu e disfras di cowboy di TOB y a acerca TOB pa e donacion aki pa nan muchanan celebra nan eventonan di Carnaval. Señoa Boekhouwer a remarca cu si tin otro participante di TOB cu kier haci donacion di nan sombre ainda, por hiba nan na New India Assurance pa asina e juffrouwnan tambe por haya un sombre di cowboy. Tambe por tuma contacto cu nan via nan pagina di Facebook.

   Scol Dun’un Man y Colegio San Antonio a keda hopi contento cu e donacionnan aki y ta gradici Quota International of Aruba, TOB Carnival Group y New India Assurance pa e colaboracion ricibi pa nan muchanan goza di nan eventonan di Carnaval.