Sala Safiro a bira un espacio nobo pa comparti conocimento y inspiracion cultural

Yosmar Sneek di Biblioteca Nacional Aruba:

 ORANJESTAD (AAN):  Dia 20 di augustus 2024, durante e celebracion di 75 aña di trabao di Biblioteca Nacional Aruba, a keda introduci un sala nobo: Sala Safiro.  Esaki ta ubica unda tabata antes e sala di estudio. A parti esaki den dos y awor tin Sala Safiro dilanti di e sala di estudio.

            Yosmar Maduro-Sneek, hefe suplente na BNA a splica den entrevista cu DIARIO cu Sala Safiro tin e informacion di biblioteca mes, banda di e coleccion di bukinan manera enciclopedianan, cu ta bukinan cu no ta wordo presta. Tambe tin informacion di biblioteca mes tur esaki den un ambiente comodo caminda por sinta y studia.

            Sala Safiro tambe ta alberga varios exposicion. Un cu tin di haber cu e proyectonan cu biblioteca tin cu ta den un solo cashi y entre e otro cuater exposicionnan tin esun cu ta keda permanente cu ta di e directora cu ta Sra. Astrid Britten.

            Tin e exposicionnan cu ta pa publico di pafo di biblioteca y cu aworaki ta dedica na Club Papiamento Aruba, cual ta un grupo di comunidad cu tin como obhetivo principal motiva e comunidad imigrante pa siña idioma Papiamento a traves di diferente actividad manera ehercicionan y bishitanan na museo y otro institucionnan. E meta di esaki ta e integracion social, laboral y cultural di esnan cu a haci di Aruba nan di dos hogar.

            Yosmar Maduro-Sneek a indica cu e exposicion aki ta pa gruponan manera asociacion, comision, clubnan, team di deporte, etc. Nan por aplica pa haya un espacio den Sala Safiro den e cashi aki.      

            Banda di dje tin dos otro exposicion di e trahadonan di biblioteca cu ta dedica na diferente topico manera e proyecto di 'Sustainable Education Symposium'  cu e tema di Ban Planta. E otro expo ta tocante flornan di Aruba y "rond di nos", el a splica.

            E exposicionnan aki a cuminsa na december y na april lo inicia cu e siguientenan.

            E exposicionan aki ta un forma pa trece e informacion dilanti pa asina publico por haya sa mas tambe. Esaki ta exponan cu ta cambia cada 4 luna.

            Mester remarca cu e interes ta grandi y cu si algun grupo ta interesa pa ta den e expo di e gruponan di pafo por aplica awe mes pa asina por bin na remarca, Yosmar a indica.

            Bishita Sala Safiro y probecha pa siña di e bunita exponan aki den un ambiente comodo na Biblioteca Nacional Aruba na George Madurostraat.