Ryçond do Nascimento a reacciona riba victoria di Ministerio Publico contra Speed

E ta haya cu defensa a faya barbaramente

ORANJESTAD (AAN): Segun Parlaemntario Ryçond do Nascimento, e locutor Patrick Paskel a demostra hopi biaha cu e ta un spin doctor cu ta gusta troce e berdad. E ta haci esaki pa desvia atencion for di casonan di corupcion y pa normalisa bandides. Su actuacion despues di e decision den caso di su amigo y colega Speed Andrade (na Enfoke, Facebook, di dia 18 di december 2024, for di 58:52) ta confirma un biaha mas cu e tin caya. El a yama e fiscal pa payaso y a afirma cu hues a desbarata e argumento di Ministerio Publico. E efecto di e retorica criminal di Patrick ta cu den e commentsnan, Speed ta worde felicita pa su condenacion y ta worde anima pa sigui cu su “bon trabao”.

   E ponencianan di Patrick ta falso y ta crea un imagen completamente incorecto di kico berdaderamente a pasa. Laga nos pone berdad riba un pedestal den e caso contra periodista Speed. Ministerio Publico a logra un gran victoria den e caso aki. Speed a worde condena na 18 luna di prison, di cual 12 luna ta condicional. E motibo di su castigo ta pasobra Speed a soborna un polis y a traha hunto cu otronan pa haci actonan criminal, den e caso aki violacion di secreto policial. E defensa di Speed a faya barbaramente, pasobra abogado Canwood no a logra refuta e puntonan esencial di e caso.

   Condena pa puntonan esencial: E unico exito chikito di Canwood tabata relaciona cu e di tres acusacion: participacion den un organizacion criminal. E abogado a argumenta cu no tabatin suficiente prueba cu ta trata di un organizacion criminal, pasobra no tabatin di un colaboracion structural y duradero entre Speed, Brian y otronan. Hues ta haya mas bien cu ta trata di e delito di colaboracion criminal (medepleging).

   Esaki ta e situacion caminda dos of mas persona ta traha den un manera consciente pa comete un of mas delitonan. Cu otro palabra e defensa no a logra refuta cu Speed ta un criminal.

  Pues Ministerio Publico ta logra victorianan crucial. Den su lucha contra criminalidad cu ta mina nos estado di derecho Ministerio Publico a prueba cu: (*) Speed a corumpi un polis door di ofrece soborno (1.500 Florin pa luna) y servicionan, a cambio di obtene acceso ilegal na informacion confidencial di polis. (*) Speed a uza ilegalmente e Tetra-radio di polis pa medio di un sistema tecnico instala den e cas di Vos.

   Abuso di libertad di prensa no ta worde acepta!  Hues a rechasa rotundamente cu Speed lo a actua den e marco di libertad di prensa. E abogado a purba bende cu Speed como periodista tabatin e derecho pa busca informacion di interes publico. Hues a bari e argumento aki for di mesa door di subraya cu libertad di prensa no ta excusa pa kibra ley. Corte a enfatisa cu no tabatin ningun hustificacion pa Speed corumpi un polis door di ofrece soborno. El a haci e pa satisfice su interes personal/financiero.

   Castigo di prison pa Speed: Libertad ta sagrado den un estado di derecho. P’esey e castigo di prison cu Speed a haya ta subraya e gravedad di su delitonan. Aunke e Ministerio Publico tabata pidi 24 luna di prison y detencion inmediato, Corte a dicta 18 luna di prision, di cual 12 luna condicional. E reduccion den e duracion di e castigo ta relaciona cu tempo cu a pasa despues di e hecho y falta di necesidad pa un detencion inmediato.

  Hecho ta cu e castigo di prison ta keda un golpi duro pa Speed, cu awo por worde considera un recidivista di corupcion periodistico y soborno. Esaki ta e di dos biaha cu Speed ta worde condena pa delitonan similar. Corte a indica cu Speed no a siña di su erornan y a continua cana den e caya di ilegalidad.

  Conclusion: un victoria contra corupcion: E caso aki ta un victoria cla pa e Ministerio Publico, cu a logra prueba e puntonan esencial cu a resulta den e condena di Speed. E caso ta sirbi como un advertencia pa tur persona cu kier abusa di informacion confidencial policial, sin importa nan profesion.

   Aki, nos a mira husticia duna resistencia contra e sistema di corupcion y patronahe cu ta afecta mas cu solamente e politico. E caso ta mustra cu corupcion ta contamina miembro di prensa, funcionarionan publico y hasta miembronan di cuerpo policial. Ta ora cu pueblo di Aruba lanta para y bisa ta basta y asina sali na defensa di nos pais.