Revision di e Reglement van Orde pa independisacion di Parlamento ta na DWJZ caba

Marlon Sneek, Presidente di Parlamento:

*Aworaki e proceso ta na mas of menos 65% 

ORANJESTAD (AAN) – Presidente di Parlamento, señor Marlon Sneek, den entrevista cu DIARIO a menciona cu aunke e tin tres dia den su funcion, desde Diabierna cu a pasa, el a haya oportunidad di sinta cu Griffier. El a wordo informa cu pa locual ta independisacion di Parlamento, e proceso ta na 65% mas of menos, e revision caba di loke ta Reglement van Orde cu ya caba ta na Directie Wetgeving Juridische Zaken (DWJZ), unda ta tira un bista riba dje pa e partinan legal, y basa riba dje Parlamento por oficialic’e. Esey ta bira e Reglement van Orde nobo di Parlamento.

            “Nos mester caba cu e ‘Functie Bestrijdingnan’ den Parlamento, con e structura ta bay ta, kico ta e funcionnan cu ta bay tin, ken ta bay tuma e funcionnan aki, y tambe mester traha riba e Ley mes, unda bo ta independiza Parlamento. Aworaki, Parlamento tin su presupuesto caba, pero ta dia di awe e ta resorta bao di Prome Minister”, Marlon Sneek a relata.

            Presidente di Parlamento a indica cu nan tabata tin un structura cu a cuminza for di 2017, unda cu Algemene Rekenkamer, Parlamento y Raad van Advies, ta e tres organonan cu mester a bira independiente, pasobra tur tres ta resorta bao di Prome Minister, pero por a wak tambe cu esun cu tabata presidente di e Comision, señor Swaen, a entrega su retiro. Mester wak, den e caso aki, con gobierno lo bay sigui atende cu ne, si ta bay keda cu e Comision ey, si ta bay nombra otro presidente”, Sneek a señala.

            Sneek a expresa cu, en todo caso, pa loke ta Parlamento esaki a cuminza move caba den e cambionan cu mester tin. E reglement van orde a wordo atendi caba te cu el a bay over na RvA, den e Comision, y mescos mester pasa cu e Ley di Independisacion, unda cu tur fraccion ta participa, riba e mesun liña pa despues no yega sala cu bo no ta di acuerdo cu esaki of esaya.

            Marlon Sneek ta kere cu mester haya tur hende riba un liña, y ora e caba mester manda e Ley ainda na DWJZ, unda cu nan mester haci nan revision y entrega e producto final.

            “Mi ta kere cu si nos haci un esfuerzo, e concepto lo por ta cla pa wordo entrega na DWJZ, y den e curso di otro aña lo por tin un votacion riba dje. Manera mi a bisa nos cu haya tur hende di acuerdo cu locual tin poni den e documento pa mañan bo no ta haya ‘cu a traha un ley pa fit esaki, pa fit esaya. Idea ta pa nos haya un ley cu tur hende ta carga, y practicamente ora e ta yega sala nos ta keda unanime pasobra tur hende a traha den dje”, Presidente di Parlamento Marlon Sneek a señala.