Reunion awe den Parlamento ta trata di un reunion di caracter informativo

Prome Minister Evelyn Wever-Croes:

*Ta reina hopi confusion y preocupacion den pueblo

ORANJESTAD (AAN): Dialuna 4 di november Gobierno di Aruba a yama un Conferencia di Prensa pa elabora riba e reunion den Parlamento di dia 5 di november unda Prome Minister Evelyn Wever-Croes a wordo yama pa duna cuenta riba metemento den Ministerio Publico.

            Prome Minister a indica cu ta reina hopi confusion y preocupacion entorno e reunion aki. E mandatario a splica cu ta trata di un reunion unda el a wordo yama pa duna cuenta riba metemento directo den Ministerio Publico cual ta palabranan exacto cu Parlamentarionan Marisol Tromp, Miguel Mansur y Aquanette Gunn a uza den nan peticion pa e reunion aki.  Naturalmente esaki a causa bastante confusion y tension den comunidad y aki Prome Minister a splica kico a causa tanto tension.

            Desde 9 di september na Aruba tin un situacion politico tenso na e momento cu Gobierno a cay despues cu partido RAIZ a kibra e palabracion di e acuerdo di coalicion. E disgusto a bin ora cu na un manera inusual un partner di coalicion ta cera alianza y busca sosten cerca oposicion cu entre nan tin e parlamentario condena pa husticia pa 4 aña, y asina como mayoria a baha e presidente di parlamento e tempo ey, señor Edgard Vrolijk.

            E disgusto a sigui crece dia 15 di october ora cu Minister Endy Croes ta wordo yama den parlamento y wordo baha como minister despues di un mocion di desconfiansa sin base  motibo of prueba pa bah’e. No tin ningun investigacion den su contra y Minister Endy Croes a actua segun regla ora a constata iregularidadnan den un fundacion cu ta cay bou su ministerio. Pero pruebanan y berdad no a yuda y toch oposicion a bah’e.

            Locual a haci e situacion mas tenso ainda ta cu durante e reunion di 15 di october, oposicion a declara na un forma hopi contundente y yena cu rabia cu Minister Endy Croes ta e prome di e ministernan, y cu nan lo yama tur e ministernan y un pa un lo baha nan.

            “Esaki a intensifica e disgusto y tension den comunidad cual ainda na e momentonan aki ta sinti esey. P’esey mi a yama e Conferencia di Prensa aki pa duna e informacion corecto y pasa e mensahe na comunidad di Aruba pa keda trankil. No tin motibo pa tanto tension ni panico. Tin un reunion yama pa di 5 di november di caracter informativo unda parlamentarionan lo haci pregunta y ministernan ta contesta. Mi persona hunto cu colega Rocco Tjon lo ta presente pasobra e tema ta trata di metemento den Ministerio Publico, y Minister di Husticia tin e responsabilidad di sali na defensa di Ministerio Publico. Mi ta pidi comunidad un bes mas pa keda trankil paso e informacion cu nos ta bay comparti riba 5 di november ta importante y comprondiendo bon, por mira cu no tin ningun motibo di preocupacion”, Prome Minister a expresa.