Resultado Investigacion AFTA ta conclui cu prijs di comestibel na Aruba ta mas caro cu Merca y Hulanda

​

Ernesto Kross, director:

*Arubiano ta gasta 40% di presupuesto na comestible 

ORANJESTAD (AAN) – Den e conferencia di prensa yama pa Aruba Fair Trade Authority (AFTA), su director señor Ernesto Kross, a splica na prome lugar, kico AFTA kier logra cu e investigacion cu nan a realiza, manera señor Roly Sint Jago a comenta prome.

            El a splica cu tabata tin dos motibo pa cuminza e investigacion aki. E prome proposito tabata esun di prijs. “Nos tur sa y nos ta ripara cu prijsnan na Aruba ta halto, pero e ora e pregunta ta: kico ta halto? Cu kico por compara? Y nos kier a haya sa tambe e structura di e supermercadonan”, Kross a menciona.

            El a agrega cu mercado, di e supermercadonan tin hopi producto, pero nan a enfoca riba comestibel, pasobra esey ta e productonan cu tur hende mester di dje, ya cu ningun di nos por biba sin come.

            “Nos a haci diferente tipo di investigacion; nos a haci test cu research, nos a busca den fuentenan publico, investigacionnan cu a wordo haci caba y cu a publica nan resultadonan, nos a uza esey tambe. Y nos a haya informacion riba websitenan publico, manera Camara di Comercio, CBS, y otro registronan, etc. Tambe nos haci entrevista: nos a sinta cu varios compania, varios actor den e mercado, pa compronde kico nan ta enfrenta cu ne. Nos a haci veld research, esey kiermen cu nos mes a bay diferente supermercado pa wak y compara prijs”, señor Kross a duna di conoce.

            Nan a investiga e desaroyo di prijs pa por compronde kico a sosode den e añanan, con prijs a desaroya su mes. “Nos a wak e prijs relativo, den e rapport por wak con e prijsnan di comestibel ta afecta e presupuesto di nos Arubiano. Tambe nos a check prijs absoluto, productonan cu nos a compara cu prijs di otro paisnan tambe”, Kross a bisa.

            El a agrega cu un parti hopi importante di e rapport ta e structura di e mercado. El a sigui cu nuebe conclusion cu nan a saca for di e investigacion.

            E prome ta cu prijsnan ta halto, manera nos tur sa. “Pero den e rapport por lesa con halto nan tabata, y enberdad mas halto cu prijs na Hulanda y na Merca. Pero ta comparabel si, cu prijsnan na Curacao. Antes na Curacao, e prijsnan tabata mas abao pero awo nos ta wak cu Aruba cu Curacao ta cerca.

            Tambe nos a wak e efecto di e entrada di nos mes. Ora bo wak cu e prijsnan t’asina halto, e pregunta ta cuanto placa bo ta resta pa otro cosnan, manera awa, coriente, y bukinan di scol pa bo yiunan. 50% di nos Arubianonan ta gasta 40% di nan presupuesto na comestibelnan, cu ta un porcentahe hopi halto si bo compara cu Merca y Hulanda. Na Merca ta 14% cu hende ta gasta na comestibles, na Hulanda ta 20%. Na Aruba 40% y akinan por wak cu esey ta  hopi”, señor Kross a indica.

            Algo tambe hopi importante ta cu e efecto di transporte pa productonan por yega na Aruba, ta tuma un parti grandi den e prijs, pero toch a mira cu esey ta algo stabil y ta limita.