Respaldo ta gradici Aruba Bank pa su valioso aporte na salud mental di Aruba

ORANJESTAD (AAN):  Respaldo ta sumamente agradecido pa e gran donacion cu nan a ricibi di Aruba Bank como parti di e celebracion di nan 100 aña.

Den cuadro di nan centenario, Aruba Bank ta contribuyendo bek na comunidad door di haci tur luna un donacion di AWG 100,000 na organisacionnan cu ta haci un impacto positivo pa Aruba.

            Aruba Bank a hasi un sondeo den comunidad y hopi hende a indica cu Respaldo ta un di e organisacionnan cu ta merece un donacion manera esaki. Respaldo ta sumamente honra di a wordo selecciona.

            Danki na e apoyo di Aruba Bank y e comunidad di Aruba, Respaldo a ricibi dos vehiculo: un KIA Picanto, cu lo wordo utilisa pa mobiliza nos personal di cuido ambulante pa por bishita e cliente na cas y un minivan cu capacidad pa 15 persona. E minivan aki lo ta di gran balor primordialmente pa nos departamento di Dagbesteding, pero tambe pa tur otro departamento di Respaldo cu ta atende cu cuido di cliente. Esaki ta habri porta pa mas actividadnan pa nos clientenan, promoviendo participacion den comunidad, kibrando stigma y stimulando bienestar mental.

            Respaldo ta sumamente agradecido na Aruba Bank pa mira e necesidad di e organisacion y pa yuda Respaldo sigui den nan rumbo pa brinda un organisacion di salud mental specialisa, profesional y sostenibel — pa un Aruba mentalmente mas sano.

View the embedded image gallery online at:

https://diario.aw/categories/noticia/general/respaldo-ta-gradici-aruba-bank-pa-su-valioso-aporte-na-salud-mental-di-aruba#sigProIdd177061839