Respaldo ta duna espacio pa investigacion entorno e sucedido lamentabel

ORANJESTAD (AAN): Respaldo a tuma nota di e informacion cu a sali den e medionan tocante e incidente tragico unda un cliente di Respaldo a perde su bida. 

Teniendo na cuenta e privacidad di e cliente involucra y di su famia, como tambe e investigacion andando, Respaldo no lo duna informacion detaya riba e caso aki.

Prome cu tur cos, Respaldo kier expresa su sincero condolencia na e famia y sernan keri di e persona cu a perde su bida. Nan pensamento ta cu e famia como tambe cu tur e profesionalnan cu a keda involucra den e incidente impactante aki. Ningun hende no ta desea un resultado asina.

Actualmente, e incidente ta bou di investigacion pa e debido autoridadnan. Respaldo ta brinda su cooperacion completo na e investigacion aki y cu respet pa e proceso, no ta considera apropia pa adelanta riba e resultadonan ni pa haci declaracion di contenido riba esaki.

Pa clarificacion general, Respaldo ta considera importante pa splica con e servicio di nos Crisisdienst ta organisa y ta funciona.

For di oktober 2024, Respaldo ta dispone di un servicio di crisis 24/7 pa personanan cu problematica psikiatrico serio den situacion di crisis. E servicio aki ta wordo ehecuta pa profesionalnan di cuido specialisa y ta forma parti integral di e FACT-teams di Respaldo. E servicio di crisis ta enfoca riba evaluacion, stabilisacion y tratamento di crisis psikiatrico, preferiblemente den un fase mas tempran posibel.

E servicio di crisis ta funciona den un cadena di colaboracion cu diferente partner. Dependiendo di e situacion, por pidi apoyo di otro instancianan, incluso polis pa garantisa e seguridad publico y servicio di transporte pa traslado di clientenan.

Respaldo ta comprometi, hunto cu su partnernan, pa fortalece mas ainda e colaboracion mutuo, comunicacion y coordinacion, cu e obhetivo comun di ofrece cuido profesional y humano na personanan cu problematica psikiatrico.

Respaldo ta pidi pa comprension y respet pa e privacidad di tur persona involucra mientras cu e investigacion ta andando.