Rescate pabao di Aruba di dos turista riba Waverunner

Dos turista haya basta leu for di costa

ORANJESTAD (AAN): Tabata Diamars atardi, cu Centro MOC di Wardacosta di Caribe Hulandes a ricibi un notificacion di un compania di watersport den area di Eagle Beach cu tin dos turista perdi riba lama.

   E compania di Watersport mes na comienzo a bay busca e dos turistanan riba lama y a bin  topa cu un Waverunner, pero no tabatin ningun persona ariba.

   Mesora e Centro di Operacion (MOC) di Wardacosta a dirigi e helicopter y un Metal Shark pa busca e dos turistanan riba lama.

   Durante e buskeda a bin topa cu e otro Waverunner na como 3 miya for di costa di Hadicurari cu un hende homber so ariba. Ya na e momento ey solo a baha, y esaki a cuminsa dificulta e buskeda di e di dos persona.

   Pero usando tecnologia di FLIR, dado momento e Helicopter a bin detecta y mira un hende homber den lama na mas o menos 2.7 miya for di costa.  Cu e relato aki, Centro MOC a dirigi e Metal Shark pa bay saca e homber for di lama.

   Esaki a resulta di ta e otro turista hende homber cu tabata perdi. Ora a saca e homber for di awa, e homber aki a indica cu e no tabata sinti su curpa bon. Mesora e helicopter di Wardacosta a bin busca e homber, his'e cu cabuya for di riba e Metal Shark pa hiba e homber aki Aeropuerto Reina Beatrix, caminda un Ambulance tabata warda riba dje pa hibe Hospital.

   Den pasado tabatin un pista di aterizahe pa Helicopter na e Hospital di Aruba.  Pero ora cu a renoba Hospital y crea hopi edificio nobo, e pista aki a desaparece.  Awor ta na Aeropuerto tin di baha pa trece hende malo.