Rescate di cuatro naufrago riba lama bruto Noordwest di Aruba

Nan Catamaran a sink

• Cu helicopter a saca nan for di lama 

ORANJESTAD (AAN): Un emergencia cu a socede riba Lama Caribe, cerca di 150 miya Noordwest di Aruba, tabatin un final feliz ora cu e piloto di Helicopter di Wardacosta di Caribe Hulandes a sa di haci maniobranan pa asina yuda cuatro naufrago den e lama bruto aki.

   E dianan aki lama Caribe ta basta bruto, cu olanan cu tin biaha tabata yega 6 pa 7 pia.  Y precisamente riba Diadomingo 5 di Januari 2024, Wardacosta di Caribe Hulandes a ricibi yamada di auxilio riba VHF Marine canal 16, cu un Catamaran ta den peligro.  E tabata como 240 kilometer leu.

   E informe ta cu e Catamaran cu 4 persona abordo, e momento ey ta bezig ta zink, pa cual e tripulacion a haya nan ta bula rapidamente di e boto, y bay den un boto salbabida.

   Mesora Centro MOC a laga e avion Dash-8 di Wardacosta lanta vuelo pa move pa e lugar pa tira bista di loke ta pasando y pasa informacion over.  Centro MOC a manda Helicopter tambe pa e lugar.

   Ora cu e avion Dash-8 a yega, nan a nota cu e tripulantenan ta den un boto salbabida, y cu e Catamaran mes cu e nomber ‘Second Wind’ a bolter y ta cuminsa zink aun mas.  Sperando e helicopter yega, e avion Dash-8 a keda bula rond pa vigila unda e boto salbabida ta moviendo.

   Na momento cu e Helicopter a yega, e tripulantenan a hisa uno-pa-uno e tripulantenan aki.  Unavez cu tur cuatro ta abordo, e Helicopter a bula bay rumbo pa Curaçao.

   Na yegada, nan a wordo atendi door di funcionarionan di Inmigracion.  Nan tur ta bon di salud.

   Mientras tanto, Centro MOC a manda un mensahe ‘NavTex’ pa tur barco nabegando den e area ey, pa nan tene cuidao cu e Catamaran aki riba lama cu tabata keto bay ta zink.

   Wardacosta no a duna informacion ta ki nacionalidad e personanan aki ta, y tampoco ki rumbo e Catamaran tabata bayendo.