Renobacion di pier dilanti ex-Brisas del Mar na Savaneta oficialmente completa

Minister Geoffrey Wever:

 *Un proceso di destaho transparente, ehecucion rapido y resultado concreto pa sector primario 

ORANJESTAD (AAN): Minister di Sector Primario, Geoffrey Wever ta orguyoso pa por anuncia cu e renobacion completo di e pier di ex-Brisas del Mar na Savaneta a wordo finalisa cu exito. Cu esaki, un infrastructura esencial pa nos piscadornan y pa e comunidad di Savaneta ta oficialmente habri bek pa uso publico.

   E proceso a cuminsa cu un proceso di destaho conforme cu ley, cu a garantisa transparencia y competencia husto. Despues di evaluacion tecnico y financiero, e destaho a wordo otorga na un contratistacu amplio experiencia den construccion y renobacion di piernan na Aruba. Na september 2025, Minister di Finansa, Asunto Economico y Sector Primario, Geoffrey Wever, a firma e Uitvoeringsovereenkomst, formalizando e inicio oficial di e proyecto.

   Posteriormente, cu e acto di groundbreaking apensa algun dia pasa, e trabaonan a cuminsa oficialmente. Durante e periodo di ehecucion, e pier a keda temporalmente fuera di uso, pa asina por realisa un renobacion profundo, incluyendo palo y instalacion di trapi completamente nobo, cu enfoke riba durabilidad, seguridad y funcionalidad.

   E proyecto aki ta parti di e compromiso concreto di Gobierno, manera stipula den e Programa di Gobernacion AVP-Futuro 2025-2028, pa fortifica e sector primario y mehora infrastructura basico pa nos piscadornan. Pa e trayectoria aki, a wordo aloca un inversion di Afl. 500.000 pa renobacion di diferente piernan rond di Aruba, cuminsando cu Savaneta.

   E pier di ex-Brisas del Mar ta un punto fundamental pa piscamento, landamento y actividadnan comunitario. Cu su reapertura, nos ta restablece un espacio vital pa actividad economico y social den Savaneta.

   “E culminacion di e proyecto aki ta mustra cu ora nos combina planificacion serio, proceso transparente y ehecucion eficiente, nos por logra resultado concreto pa nos comunidad. Mi kier gradici tur stakeholder cu a contribui, e contratista y su ekipo tecnico, nos funcionarionan  di Santa Rosa y asesoranan, Fundacion Savaneta Prome Capital y specialmente e comunidad di Savaneta pa nan pasenshi durante e periodo di trabao. Awe nos ta entrega un pier mas sigur, mas fuerte y cla pa futuro,” minister Wever a declara.

   Gobierno ta reafirma su compromiso pa sigui inverti den infrastructura esencial cu ta sostene crecemento economico, seguridad alimenticio y desaroyo duradero di e sector primario di Aruba.