Relatando e importancia di ta corectamente registra na Camara di Comercio

Comite Olimpico Arubano

ORANJESTAD (AAN):  Diamars anochi durante e di 6 siman di e curso di “Capacity Building Training”, a toca e tema di responsabilidad legal, unda a trata e topiconan relevante manera e rekisito pa tur federacion cu tin como formato legal ta un “vereniging”, pues un asociacion pa ta inscribi na Camara di Comercio (KvK).

            Esaki sigur ta algo conoci na mayoria di federacion, pero a splica hopi den detaye, e dicon e ta  obligatorio pa registra desde introduccion di Buki 2 di Codigo Civil, loke a tuma lugar na januari 2021, kico tur mester registra na KvK, ademas di haya un splicacion amplio di e diferente servicionan cu KvK.

            Representante di KvK, Sra. Sue-Ellen de Freitas Sousa ta na cabes di e departamento di “Business Information & Support” na Camara de Comercio di Aruba y tambe ta miembro di e “Management Team”. Cu mas di 14 aña di experiencia na Camara di Comercio Sue-Ellen ta duna apoyo y informacion esencial na “entrepreneurs” y inversionistanan cu interes di hasi negoshi na Aruba. Ademas Sue-Ellen tin un rol importante den creacion di relacionnan strategico cu gruponan di interes, pa asina contribui na crecemento y desaroyo di e comunidad empresarial local.

            "E aspecto principal cu a crea bastante combersacion entre señora De Freitas-Sousa y e dirigentenan deportivo presente ta e importancia di compronde e diferencia entre un "fundacion" (stichting) y un "asociacion" (vereniging). COA a elabora cu e formato legal den deporte ta un asociacion, mirando cu esakinan por tin miembro registra y un fundacion no tin e posibilidad ey." "Unabes a yega na e parti di statutonan, sra. De Freitas-Sousa di Camara di Comercio a enfatisa e importancia di actualisa e statutonan y despues registra esakinan na KvK, specialmente desde introduccion di e Codigo Civil nobo na januari 2021.

            Desde e momento aki dirigentenan di federacionnan y otro asociacionnan cu no tin nan statutonan actualisa ta core e riesgo di wordo teni personalmente responsabel pa eventual debenan di e organisacion. Mester bisa cu esaki a trece cune hopi discusion sano pa asina wak kico esaki kiermeen y kico tur por hasi pa mitiga e problemanan aki. Ta gradici Sra. Sue-Ellen de Freitas Sousa pa su tempo y contribucion, y a yame bon bini den e famia Olimpico.

Fuente: Facebook Page COA