Regularmente ta controla y den mayoria caso luganan y personanan tin nan carchi di salud na ordo

Segun señora Yvette Geerman di DVG:

ORANJESTAD (AAN): Dienst Warenkeurig en Hygiëne di DVG regularmente ta haci control di carchinan di salud, carchi berde, y ta haci apelacion na tur negoshi cu ta bende cuminda, y no tin carchi di salud ainda, pa aplica pa esaki.

   Segun hefe di e departamento, señora Yvette Geerman, generalmente e ta bay bon y den lineanan grandi nan ta hopi satisfecho. Pero toch nan ta encontra algun caso na unda luganan di bende cuminda no tin nan carchi na ordo y valido.

   El a menciona cu tin sanccion pa esnan cu no tin carchi di salud mientras nan ta bende cuminda. Pero, e momento cu haya un persona ta bende cuminda sin carchi di salud valido, e tin pa stop di bende cuminda. Y si den un negoshi di bende cuminda no tin persona cu carchi di salud valido, mester cera e luga. Den caso cu nan kier sigui opera, nan tin pa busca un persona cu si tin carchi di salud valido.

   “E proceso pa haya un carchi di salud ta dura minimal 10 dia di trabao. Y pa haci e proceso mas facil, por download nan carchi via e Health App y no necesariamente mester bay busca na e departamento. Tur instruccion con pa bin na remarce di un carchi di salud ta ser haya riba website di DVG”, señora Geerman a duna di conoce.