Reduccion di loonbelasting tabata resultado di liderazgo y bon gobernacion di Gabinete Wever-Croes

Parlamentario Xiomara Maduro:

ORANJESTAD (AAN): Na comienso di aña 2025, Gabinete Wever-Croes a demostra un biaha mas cu e liderazgo fuerte y e bon gobernacion di MEP, ta duna su fruto na bienestar di Pueblo di Aruba. Danki na un maneho responsabel di finansa publico, Gabinete Wever-Croes a logra baha e loonbelasting, un decision politico cu ta pone e interes di e pueblo di Aruba na prome luga.

E cambio aki a crea un alivio directo pa miles di famia. Den 2025, 16 mil hende no mester a paga loonbelasting mas, mientras cu 12 mil hende a paga menos loonbelasting, locual ta significa un 300 florin extra tur luna den nan cartera. Como cu e cambio aki ta conta tambe pa inkomstenbelasting, e pensionadonan tambe no mester a paga of a paga hopi menos belasting riba nan entrada den 2025.

Den un periodo unda costo di bida ta sigui subi, MEP a tuma responsabilidad pa proteha e poder di compra di trahadonan. E no ta coincidencia, ta resultado di disciplina financiero, prioridad social y decisionnan cu ta pone e bienestar di Aruba riba interes politico pa simplemente gana un eleccion.

MEP a mustra cu ora un partido ta lidera cu vision y integridad, e resultado ta concreto y positivo. E pueblo ta sinti e diferencia, y e economia local ta beneficia di mas consumo y mas stabilidad.

“E decision cu a wordo tuma un aña pasa, awe ta mustra su impacto real. MEP no ta papia di cambio, MEP ta haci cambio,” Parlamentario Xiomara Maduro ta expresa satisfecho di e trabou haci den ekipo na bienestar di Aruba.