RAIZ ta bay tin dos miembro den Parlamento y miembronan como minister tambe

ORANJESTAD (AAN):  Ursell Arends, Lider di partido RAIZ, den entrevista cu DIARIO a haci un resumen riba e dianan cu a pasa pa loke ta e proceso di reunionnan cu ta tumando lugar entre stakeholdernan cu Formador di Gobierno, Evelyn Wever-Croes.

Arends como lider di partido RAIZ cual ta e partido cu lo forma coalicion cu partido MEP y lo sinta den gobierno a splica cu esaki tabata un momento di hopi experiencia mirando on e formador ta hibando e reunionnan aki y con nan ta wordo hinca den otro.

Como partner den coalicion, a bisa, no ta necesariamente cu nan ta wordo inclui den e tipo di reunionnan aki. "Pero esaki pa nos ya caba ta un honor di forma parti y no solamente ami so como lider di RAIZ, pero tambe cu mi por a trece otro miembronan erbij pa asina akinan hunto nos scucha kico ta e preocupacionnan y kico ta biba cerca mayoria di stakeholders pa asina aki nos tin un bon idea tambe un bes cu nos asumi nos responsabilidad di ta gobernante", Arends a remarca.

El a sigui bisa cu esaki ta hopi importante mirando cu durante henter e campaña a papia di participacion y e participacion ta inclui inclusion di tur e stakeholdernan aki tambe, mirando cu nan ta forma parti crucial di con ta bay guia e isla pa dilanti.

E informacion cu a haya ta hopi valioso, a enfatisa y e positivismo cu ta biba cerca e stakeholders tambe ta duna entusiasmo cu si traha hunto lo por trece solucionnan duradero y berdadero pa tur e ciudadanonan di Aruba, a bisa.

A agrega cu RAIZ ta un partido cu a trece diferente experticio hunto pa por trece solucionnan. Ta bay tin dos miembro den Parlamento y muy probablemente miembronan como minister tambe.

"Sigur pueblo di Aruba lo por bay conta cu RAIZ y miembronan di RAIZ cu ta cla pa traha riba e bienestar general di nos comunidad", Ursell Arends a expresa.