Pueblo a probecha di ultimo oranan pa haci compras pa Pasco

Arubianonan a warda te ultimo dia pa shopping

• Playa tabata stagna henter dia cu trafico 

ORANJESTAD (AAN): Diamars 24 di December, net riba e dia cu hopi negoshi ta cera mas trempan cu costumber, por a nota cu cayanan den casi full Oranjestad tabata completamente congestiona.

   Ta papia aki di Caya Betico Croes, De La Sallestraat, Vondellaan, Avenida Milio Croes, Kamerlingh Onnestraat, Caya Ernesto Petronia, Emanstraat, Hendrikstraat, Wilhelminastraat, Havenstraat, y tambe Lloyd G. Smith Boulevard.

   Hendenan riba pia ta cumpra cuminda, paña, zapato, y co’i hunga.  Semper ta conoci cu tin hopi persona cu ta warda te dia 23 y 24 di December pa bay haci compras.  E ta trece discusion innecesario, esta cu hendenan no por haya e mercancia cu nan a bay pa cumpra.  E bicicleta cu nan kier a cumpra pa nan yiu, no ta bin den e color desea.  Y e trahador ta splica cu apenas siman pasa nan tabatin monton di diferente color na benta.

   Resultado di esaki ta cu hopi ciudadano ta cuminza keha: “Demasiado hende haciendo compras!”  Anto nan ta bisa cu danki Dios ya nan ta bayendo cas.

   Rijnan na Supermarket pa paga na Cashier tabata basta largo tambe.  Otronan cu mas di 25 producto den canasta ta purba nan suerte di cumpra na Cashier di “Express Checkout” cu ta acepta maximo 10 producto.  Rabiamento ora bo hala nan atencion.

   Aunke esaki ta socede cada aña, toch hopi ta keda prefera pa lanta trempan riba 24 di December pa bay haci compras di ultimo momento.  Pesey prome cu 7:00 am, ya tin hopi hende para pafo di negoshinan sperando e lugarnan habri.

   Lugarnan di bende paña tabatin yen di hende ta cumprando no djis bistir, sino tambe zapato, tas, y accesorio.  Nan kier haya nan outfit pa “estrena” riba Noche Buena of riba Dia di Pasco.

   Toch por a mira cu mayoria di Arubianonan riba Bispo di Pasco a pone como prioridad pa cumpra cuminda.  No djis pa cena di Noche Buena (cu awor a bira hopi mas popular na Aruba), pero tambe pa cuminda pa Pasco, hunto cu su pasabocanan.

   For di algun comerciante, DIARIO a ricibi informacion cu bendedornan y managernan tabata contento con benta a bay desde weekend prome cu Pasco te cu Bispo di Pasco.  Uno di nan a splica cu el a bira toch hopi cliente cu nada di stress den curpa!  Pues nan tabatin hopi bon beis mes.  E mes a mira con un cliente di riba 60 aña di edad a cumpra un aparato basta grandi, y un di su trahadornan femenino a ofrece pa carg’e y hibe te na su auto.  Pa colmo e auto ta staciona basta leu.  E trahador femenino a haci esey cu bon beis, y na final a keda agradecido ora cu e cliente a duna e trahador un tip di 25 Florin.  Esey ta haci e Pasco aki aun mas bon pa tur hende.

   En general nan a keda satisfecho cu e benta genera durante Pasco.  Tin negoshi di bende zapato, unda trahadornan a keda traha manera robot pa yuda tur cliente cu ta buscando zapato nan mesun momento.  Nan a demostra con nan por ta multi-task y yuda diferente cliente na mesun momento, pa bay busca diferente size di zapato.

   Aunke tin algun Supermarket unda tabata dificil pa haya webo, otronan si tabatin varios caha den stock aunke ta trata di webo di ijs cu prijs di riba 12 Florin.   Unico reclamo di un comerciante di Supermarket, ta con poco interes ta parce di tabatin pa bendemento di Kerstboom e aña aki.  Varios di nan a keda na su lugar, y a keda cuminza perde blachi y bira maron.  A haya nan na ultimo ta bende nan na prijs di baca flaco di 25, 35, of 50 Florin.

   Di con asina hopi hende haciendo compras?  Uno e declara flat asina, cu e ta kere cu e aña aki debi cu lo no tin Pagara na benta ni otro klapchi di costumber, e ta prefera di gasta placa na cumpra mihor regalo pa su sernan keri.  Como cu su esposo awor ta cuminza goza mas y mas di cuminda asiatico, el a cumpra un fenomenal weya tipo ‘Wok’ como regalo pa su casa.  Pues envez di Pagara, pa Aña Nobo ta cuminda hasa den Wok nan lo bay disfruta di dje.