Prome Minister a tene su ultimo conferencia di prensa di Gobierno di Aruba

“Mi ta mira bek cu hopi orguyo na 7 aña y mei di trabounan duro”

ORANJESTAD (AAN): Diamars mainta Prome Minister Evelyn Wever-Croes a tene su ultimo conferencia di prensa pa loke ta Gabinete Wever-Croes II. Durante su presentacion, Prome Minister a elabora riba e desaroyo economico, desaroyo di inflacion, desaroyo di deficit financiero pa un surplus, gastonan di personal, y riba e debe nacional di pais Aruba.

Desaroyo Economico

            Prome Minister a splica cu di 2017 pa 2024 Aruba a conoce un desaroyo economico impresionante. Na aña 2020 debi na e pandemia 25% di e economia a desaparece, pero danki na e bon trabou di Gabinete Wever-Croes, Aruba a recupera fuertemente y awe por conta cu un GDP mas halto cu prome cu e pandemia.

Inflacion

            E desaroyo di inflacion tabata un reto mundial ya cu Aruba tambe a sinti e efecto di inflacion despues di e pandemia sigui pa e guera na Ukraïne cu tambe a contribui na e subida aki. Prome Minister a indica si, cu e inflacion na Aruba aunke halto ta mas abou cu otro partinan na mundo manera Merca y Hulanda. Tambe por mira cu actualmente e inflacion ta yegando na un nivel relativamente abou y ta stabilisando.

 Desaroyo di deficit financiero pa un surplus

            Prome Minister a indica cu na aña 2017 cu Gabinete Wever-Croes a drenta gobernacion a haya un deficit financiero devastador. Danki na e esfuerso grandi di Gabinete Wever-Croes, a logra na yega na un surplus chikito net prome cu e pandemia. Despues di e pandemia, Gobierno a lorfa manga y traha duro Cerando 2024 cu un surplus di 4% cu lo sirbi na yuda pa e Gobierno nobo por sigui duna bek na comunidad.

Gastonan di personal

            Desde cu Gabinete Wever-Croes a drenta gobernacion na aña 2017 constantemente a baha e gastonan di personal. E gastonan aki a sigui bah ate na 2024 na unda cu Gobierno a duna empleadonan publico un indexering. E subida aki no tin di haber cu e cantidad di personal sino e subida den e suma cu cada persona ta haya. Mester bisa si cu esaki tabata posibel paso e gastonan ta den e margen di 6%  compara cu e 10% stipula pa ley.

Debe nacional di pais Aruba

            Prome Minister a indica cu despues di a logra baha e debe di pais Aruba, esaki a conoce un subida bek na 2020 y 2021 debi na e pandemia. Debi na esaki, Gobierno a lora manga,  traha duro logrando asina baha e debe aki tanto nominal (suma total) y den porcentahe, serando asina 2024, segun e ultimo rapport cu a bay pa CAft, na un porcentahe di 74% treciendo Aruba na un nivel mas “safe” pa por maneha finansas, haya miho inversion, y haya miho interes riba fiansa. E palabracion ta cu na 2031 esaki mester yega na 70% pero e porcentahe aki, Gobierno ya ta yegando na 2025.

            “Mi ta mira bek cu hopi orguyo na 7 aña y mei di trabounan duro. Gobierno a haye confronta cu varios crisis, manera e crisis financiero na comienso di gobernacion, e debe cu a wordo redobla pa Gabinete Eman y e crisis social cu a explota debi cu Gabinete Eman no kier a duna atencion na e veld aki.

            Contrario di Gabinete Eman, Gabinete Wever-Croes si a dedica hopi tempo y esfuerso den e area social treciendo esnan den e veld aki hunto y purba na anima nan bek pa asina duna mas di nan mes.

            Nos no por a soluciona tur e problemanan financiero y e problemanan den e veld social, pero nos a empodera tur nos profesionalnan si pa por sigui atende cu esakinan debidamente” Prome Minister a expresa.