Prome Minister a reuni cu Minister Plenipotenciario na Washington DC Sra. Zulema Dabian

ORANJESTAD (AAN): Diaranson mainta Prome Minister Evelyn Wever-Croes a reuni cu Minister Plenipotenciario na Washington DC señora Zulema Dabian.

Durante e reunion a toca varios tema di interes general di e relacion entre Aruba y Merca pero tambe pa loke ta trata e trabounan cu señora       Dabian ta haci pa pais Aruba na embahada di Reino na Washington DC. 

Prome Minister a indica cu e relacion entre Aruba y Merca ta uno hopi importante, mirando cu Merca ta e partner mas importante pa loke ta trata nos pilar economico cu ta turismo, y pa e siguridad di nos region. Aruba su economia ta depende grandemente di Merca y hopi ta e studiantenan Arubiano cu ta bay studia eynan. E region aki ta uno instabil cu hopi desaroyo y retonan grandi y pa manten'e mas sigur y trankil e Mericanonan ta hunga un papel crucial.  

            E trabou di e Minister Plenipotenciario na Washington DC ta hopi importante pa pais Aruba en general pero tambe pa casonan individual. P.e. ora cu Colegio Nigel Matthew tabata na Merca pa un biahe di estudio, señora Dabian tabata cu nan y a yudanan.

            Otro aspecto importante cu e Minister Plenipotenciario ta traha riba dje ta e acuerdonan cu e universidadnan na Merca. E acuerdonan aki ta yuda e Arubianonan cu ta bay studia na Merca pa haya e "in-state tuition", y asina por atende e universidadnan aki pagando mescos cu un residente di Merca. Actualmente Aruba tin acuerdo cu varios scol caba na Merca, pero semper ta bon pa traha na expande esaki un poco mas.

            Prome Minister a expresa di ta hopi satisfecho cu e trabou cu señora Dabian a bin ta desplegando. Mirando cu Merca tin cambio di administracion y gobierno, ta señora Dabian ta esun cu ta mantene nos informa di cualkier incidente y ta duna nos conseho con pa atende cu esakinan pa asina nos mantene e bon relacion entre Aruba y Merca.