ORANJESTAD (AAN): Diabierna mainta a purba pa prome biaha e sistema di busca Plach'i Number pa 2025-2029 segun un sistema nobo di cita.
Y e prome reaccion ricibi tabata cu el a bay fenomenal! Hendenan ta yega pa nan cita, y ya den menos di 2 minuut a keda cla y ta bay cas cu nan plachinan den man.
Tur esey ta bin, debi cu e sistema di cita online ta pidi e doño di number pa upload su pruebanan cu el a paga e Nummerplaat, y tambe upload e prueba di Aseguro. Pues tur esakinan ta wordo controla di antemano.
Esnan cu ta yega pa nan cita, ta papia pafo cu e Security, y e ta laga bo drenta. Ora bo turno yega, ta djis mustra bo cedula y ta djis rek man y ya caba bo numbernan ta poni den e reki cla pa wordo entrega. Cada persona por busca 5 diferente plachi maximo (excepto pensionadonan).
Reaccion ricibi for di e prome dia, ta cu clientenan ta satisfecho. E sistema di traha cita ta simpel, facil, abo mes ta escoge bo orario, y ta djis pidi pa bo saca potret di bo prueba di pago, y bo aseguro valido.
Corda bon cu bo no por yega eynan y busca plachi! Prome cu cita start, tur plachi di esnan cu cita e dia ey ta wordo recogi di antemano. Pues plachinan ta poni eynan djis pa esnan cu tin cita, y pa ningun otro hende. Por a mira varios hende ta yega pensando cu nan por djis drenta y haya plachi, pero ta solamente sistema di cita ta valido. Bo por haci cita riba website di impuesto.aw
Pa pensionado: Pa e pensionadonan tambe ta uza time-slots similar cu esnan priva, pero DIMP ta haci adaptacion y nan NO mester traha cita online via computer. Pensionadonan so mag di yama 522-7423 of 522-7424 y e funcionarionan lo pone un cita den nan calender computariza pa nan haya un dia y ora.
Si acaso bo no kier yama telefon, bo por bay na DIMP mes na e Balie di Recepcion, y eynan tambe lo traha un cita pa bo pa futuro fecha y ora pa busca plach'i number. Ta tratando di schedule tur pensionado pa un cita exclusivo for di 8:00 am te cu 9:00 am, di Dialuna pa Diabierna.
