Problema di Horeca no ta mara na scarcedad di trahado so

CEO di ATA, Ronella Croes ta comenta:

• Pero na e prioridadnan cu e generacion nobo di trahado tin 

ORANJESTAD (AAN) Aruba Tourism Authority (ATA), no ta mucho envolvi den e situacion di scarcedad di trahado, den e sector di HORECA.

   Señora Ronella Croes, CEO di ATA, den entrevista cu  DIARIO a menciona cu tin hopi cu ta poniendo esfuerzo den e asunto aki.

   El a expresa cu e esfuerzo cu ATA ta bay pone ta riba e otro parti, y a bisa cu esaki no ta e punto primario pasobra anecdota ta mustra cu tin mehoracion den e paketenan cu ta wordo ofreci.

   El a bisa cu investigacion mester wordo haci riba aspecto primario y secundario.

   “Mi ta kere cu hotelnan ta hopi conciente tambe, cu no ta algo mara na escasez laboral, pero si na e generacion nobo di trahadornan cu nos ta deal cu ne, pero simplemente otro cosnan cu ta prioridad pa e generacionnan nobo, cu tin cu forma parti di e forza laboral. Nos por conta cu e cadenanan hotelero cu tin akinan, cu no ta situa solamente na Aruba, pero cu globalmente nan tin e programanan pa por sigur duna esaki mas atencion. Y atrobe, anecdota ta si, cu mi sa di varios hotel cu no ta traha seis dia pa siman, pero cu mas posibilidad ta wordo duna na cuanto dia bo ta traha, y manera bo ta traha no ta bay solamente pa e parti primario di un pakete di compensacion, pues bo salario, pero e parti di beneficionan secundario tambe; nos ta mira e movecionnan den e direccion ey”, Ronella Croes a señala.

   El a agrega cu esey lo mester haya atencion, si no lo no por bay retene e forza laboral cu nan tin, cu hopi ta bringa pa haya, pasobra nos tin e parti di escasez.

   “Si mester bisa cu den reunionnan di AHATA, representando e hotelnan cu ta miembro, nos por bisa si, cu nos tin cu cuminza pensa den un formula y e manera di pensa na Aruba mester ta cu kizas no mester tin un grado di ocupacion di 85 of 86%. Kizas esaki mester baha, permitiendo mas espacio pa miho servicio, menos presion riba cuanto hende bo mester pa traha, pero mas presion y enfoke riba e calidad cu bo ta provee, p’asina bo por sigui eleva e calidad y cantidad di loke nos ta keda atras cu ne den nos economia. E ingreso cu nos ta keda cu ne”, Ronella Croes a señala.