Prima di 5% AZV ta bira 0% pa pensionadonan cu ingreso te AWG 30.000

ORANJESTAD (AAN): E premie di 5% di AZV pa pensionadonan cu un ingreso anual te AWG 30.000 ta wordo elimina completamente y ta bira 0%.

Esaki ta un cambio concreto cu tin un impacto directo riba e ingreso neto di nos pensionadonan. Promer Minister mr. Mike Eman y Minister di Salubridad drs. Mervin Wyatt Ras a anuncia. 

E reduccion aki ta forma parti di e aumento di pensioen manera publica, locual SVB tabata cumpli cune pa e parti di AOV, pero e ta bai tin tambe un efecto positivo pa esnan cu entrada riba 30.000 florin. 

-E efecto pa pensionadonan

E eliminacion di e premie di AZV a wordo incalcula den e aumento di pensioen pa AOV’ers, y tin tambe un efecto adicional positivo pa e pensionado cu tin un ingreso extra banda di AOV, pasobra e obligacion di afdracht di premie ta wordo alivia.

Esaki ta yuda cu pensionadonan cu a sigui activo of cu tin un ingreso complementario wordo penalisa menos financieramente.

-Pakete di remedi di AZV casi completamente restaura

Tambe Minister President mr. Mike Eman y drs Mervin Wyatt Ras a anuncia cu e pakete di remedi di AZV a wordo restaura, y actualmente casi tur medicamento esencial ta di nobo cubri pa AZV.

E restauracion di e pakket ey a contribui pa baha gasto directo di salud pa hopi hende, y particular pa pensionadonan y hende cu un ingreso modesto.

-Maneho di salud y social cu direccion

E decisionnan menciona —

• eliminacion di AZV-premie pa pensionadonan cu ingreso te AWG 30.000,
• aumento di pensioen,
• alivio di carga pa AOV’ers cu ingreso adicional, y
• restauracion di e pakete di remedi

ta resultado di un enfoque coherente di maneho social y di salud di Gabinete AVP-FUTURO.

Pa e realisacion di e pasonan aki, Minister di Salud Mervin Wyatt Ras y Minister-Presidente Eman a haci esfuersonan consistenter pa logra un solucion structural cu ta pone bienestar di hende na centro.

Parti di e Plan di Mehora di Poder di Compra di AVP–FUTURO

Minister President Eman ta enfatisa cu e decisionnan aki no ta aisla. Nan ta forma parti di e Plan di Mehora di Poder di Compra di e Gobierno AVP–FUTURO, cu como meta fortalece ingreso neto, baha gasto esencial, y garanta mas seguridad economico pa nos comunidad, especialmente esnan mas vulnerabel.

Cu esaki, e Gobierno AVP–FUTURO ta demonstra cu un maneho social hiba cu curason ta sirbi e bon comun di nos comunidad.