Prijs pa traha y cumpra ayaca a aumenta na Aruba

Algun famia ta traha nan mesun ayaca pa purba di baha gasto

ORANJESTAD (AAN):  Esaki no ta un noticia sorpresa pa hopi persona na Aruba: e prijs di e 'ayacanan' a subi. Durante e temporada di Fiesta, ayaca, un cuminda cu tin su origen na Venezuela, ta un cuminda tradicional tambe na Aruba cu no por falta ariba mesa. Pero awor, hopi hende ta sintiendo e peso di un prijs mas halto. E razon principal? E aumento di prijs di su ingredientenan basico. 

Ingredientenan ta mas caro 

            Ta conoci cu e ingredientenan principal di ayaca – carni, hariña di maishi, foyo y otronan – a subi considerablemente.  E demanda halto tambe ta contribui na esaki. 

Prijs di benta tambe ta mas halto 

            Cumprado di ayaca ta nota cu e prijs di benta tambe ta subi. Na Aruba, e prijs di e ayanan cu normalmente tabata algun aña pasa entre 6 florin y 8 florin, awendia e prijs ta varia entre 10 florin y 15 florin. Tambe tin cu ta pagando 20 florin pa un ayaca of un tamal colombiano, dependiendo di su grandura y e calidad di e ingredientenan uza. Esaki ta pone hopi hende pensa dos bes ora di haci nan pedido. 

Reaccion di comunidad 

            Pa hopi hende, e ayacanan no ta solamente un cuminda; e ta un tradicion di famia y un simbolo di union durante e fiesta. Pero cu e prijs halto, hopi ta considera si nan por sigui cumpra tur aña. Algun famia ta traha nan mesun ayaca pa purba di baha gasto, pero esaki tambe ta un reto si bo no tin tur e ingredientenan of materialnan. 

Solucion? 

            Aworaki, e situacion no ta di canta macamba, pero hopi ta spera cu importacion mas barata of subsidio lo por yuda. Mientrastanto, e tradicion di prepara of cumpra ayaca ta continua manera un parti importante di e cultura na Aruba. 

            Manera un custumber, hopi hende ta busca alternativa of ta haci un plan di gasto mas cauteloso. Esaki ta mustra e importancia di e ayaca no solamente como un cuminda pa Pasco, pero como un simbolo di e cultura y tradicion di e pueblo di Aruba.