Presupuesto 2026 di Gabinete AVP-Futuro a wordo aproba pa Parlamento

Minister Geoffrey Wever satisfecho

• Ta premira un surplus di 216 miyon Florin pa e sector colectivo
• Pensionadonan lo bay ricibi 150 extra entrante Januari 

ORANJESTAD (AAN):  Minister di Finansa Geoffrey Wever ta informa cu e Presupuesto 2026 di Gabinete AVP-Futuro a wordo aproba pa Parlamento di Aruba, cu voto di confianza di tur parlamentario di coalicion AVP-Futuro.

   Ta premira un resultado financiero pa sector colectivo di 216 miyon Florin of 2,7 porciento di Producto Interno Bruto. Mescos cu presupuesto supletorio 2025, e presupuesto 2026  Gabinete AVP-Futuro ta cumpli cu e ley di supervision financiero.

   Cu aprobacion di e presupuesto 2026 Gabinete AVP-Futuro ta sigui cu su compromiso pa hiba un maneho financiero responsabel y prudente segun normanan di presupuesto ancra den ley y sigui duna e beneficio di desaroyo economico bek na pueblo di Aruba.

   Pa 1 di januari 2026 tur pensionado lo ricibi 150 Florin extra tur luna, ta ehecuta e aumento salarial di maestronan, e mehoracion di e posicion salarial di profesionalnan di gobierno, y un acuerdo entre Gobierno di Aruba y  FCCA 23 pa construccion di  casnan pagabel y hopi mas.

   E Presupuesto 2026 di Gabinete AVP-Futuro aproba pa Parlamento ta cumpli cu un saldo financiero di minimo 1 porciento pa e sector colectivo manera e Landsverordening Aruba Financieel Toezicht (LAft)ta prescribi.

   Ta premira un surplus di 216 miyon Florin pa e sector colectivo, equivalente na 2,7 porciento di Producto Interno Bruto. Di esaki, ta premira pa Gobierno un surplus di 121 miyon Florin, equivalente na 1,5 porciento di Producto Interno Bruto. E nivel di debe ta premira di baha pa 57 porciento di Producto Interno Bruto. Gastonan personal y goederen en diensten ta keda den e margen di e cuadro financiero. Cu un proyeccion di crecemento economico di 2,6 porciento den 2026, entradanan di gobierno ta proyecto pa crece cu 50 miyon Florin.

   Presupuesto 2026 ta continuacion di e compromiso di Gabinete AVP-Futuro pa implementa su Programa di Gobernacion 2025- 2028 na beneficio di Aruba. Un maneho financiero responsabel y prudente ta keda nos punto di salida y sigui duna e beneficio di desaroyo bek na nos hendenan segun minister di Finansa Geoffrey Wever.

“Mi ta gradici di curason Conseho di Ministro, bou guia di Promer Minister Mike Eman, e 12 Parlamentarionan cu ta sostene Gabinete AVP-Futuro, y tambe muy en especial tur e profesionalnan di Gobierno di Aruba, specialmente esnan di Directie Financiën y Directie Wetgeving cu a traha dia y anochi pa nos por tin awe un Presupuesto 2026 aproba!”, segun Minister Geoffrey Wever.