Presupuesto 2025 secuestra door di Gerlien Croes y Mike Eman

Parlamentario Rocco Tjon:

ORANJESTAD (AAN): Diabierna mainta den sala di Parlamento a inicia e tratamento di presupuesto 2025. Mi persona hunto cu Geoffrey Wever mester contesta preguntanan al respecto nos ministerionan. Sinembergo despues di e pro orador cual tawata sr. Mike Eman a schors e reunion. Gerlien Croes no a duna palabra na leider di fraccion di MEP, cu tawata tin un punto di ordo y tampoco na demas miembronan di Parlamento cu a yena e lista di orador. 

Sra. Gerlien croes cu un actitud di kibra regla den parlamento

            Ainda nos ta corda con sra. Gerlien Croes a vocifera su mes cu e ta para pa politica moderno, politica caminda ta respeta e organo di Parlamento y alabes tambe su pensamento cu e Presidente di Parlamento mester traha igual pa tur partido.

            Netamente e contrario nos ta constata aworaki. Sra. Gerlien Croes ta laga sera mic di miembronan di Parlamento simplemente pasobra e ta di opinion cu e no tin di haber cu e topico. E ta sera mic di Parlamentarionan mientras nan ta hiba nan disertacion y splica dicon nan kier vota na fabor of contra un ley. Kibrando asina e reglamento di ordo. Y tur esaki a culmina diabierna ultimo ora e a sera reunion, lagando tur Parlamentario cu palabra den boca, caminda a nenga nan di hiba palabra, trece punto di ordo y alabes entrega amienda. 

Onderonsje entre Gerlien Croes y Mike Eman

            Tawata bisto cu esaki tabata un palabracion haci di adelanta entre Mike Eman y Gerlien Croes y di e forma ey a secuestra e presupuesto un bes mas. Despues cu mester a keda manda carta y pidi’e pa trata e presupuesto, a yama esaki pero cu un palabacion entre Mike Eman y Gerlien Croes cu lo schors e reunion mesora despues di e prome orador cual tawata Mike Eman mes. Esaki cu tur problema pa departamentonan, fundacionnan y pa Aruba su credibilidad financiero. 

Pa conclui

            Nos ta lamenta e comentario di sra. Gerlien Croes cu tur hende tabata contento diabierna ultimo. Nos fraccion sigur tawata hopi desapunta y mas cu tur preocupa pa e forma con Gerlien Croes a mina parlamentarionan pa hiba palabra, mina nan derecho di entrega amienda y no duna lider di fraccion di MEP oportunidad pa duna su punto di ordo. Pa e motibo ey diabierna siman pasa ya caba a entrega un carta na sr. Gobernador unda nos ta comparti tur e preocupacionnan aki.

            Alabes awe nos fraccion a entrega un otro carta den cual nos ta pidi sra. Gerlien Croes pa duna nos tur corespondencia entre su persona como presidente di Parlamento cu Raad van Advies, CAFT, Directie Financiën y Minister di finansas. Esaki pa nos por monitoria e proceso pa cu e consehonan cu el a bisa di bay punta na e entidad nan aki.