Presidente di CUA no ta kere den debatenan politico

Pueblo ta haya contestanan vago

*Mester exigi contestanan real! 

ORANJESTAD (AAN) – Tin hende cu kier pa Comerciantenan Uni Aruba haci un debate. DIARIO a acerca señor Frans Ponson, Presidente di CUA, y a puntre si esey lo por.

Ponson a mustra cu e no ta kere den debatenan politico. E no ta kere tampoco cu politiconan lo  gusta pa comerciantenan haci un debate, pasobra si nan lo hacie, un lo contesta cu lo baha gasto cu 20%, otro lo bisa cu e lo bah’e cu 30%, anto ki clase di debate esey ta?

            Ponson a bisa cu eynan nan lo debati cu ne. “Pasobra nos kier subi pensioen, nos kier drecha Serlimar, nos kier drecha Arubus, nos kier duna tur sorto di pildo por nada, baha tur gasto, kita BBO, per con bo ta haci’e? Si bo bisa mi bo ta bay baha gastonan den gobierno mi ta puntra bo den cual departamento bo kier hacie?” Frans Ponson a señala.

            E ta puntra cuanto hende gobierno ta bay kita: 100 hende? Por, e no ta malo, pero tin cu bisa den cual departamento ta bay kita 100 empleado, segun Frans Ponson.

            “Con bo ta bay hacie? Bo ta bay hacie priva? Esey ta un debate! Bo mester duna un contesta, bo mester di un plan, Si bo ta bay duna algo, bo tin cu baha na otro caminda pasobra nos tur no por ta Sinter Klas, bo no por pasa duna tur caminda”, segun Frans Ponson a acentua.

            El a reitera cu e ta tende politiconan papia tocante bahamento di gasto, pero e pregunta na nan mester ta: “con bo ta bay bah'e?” Cuanto hende bo ta manda cas? Kico bo ta bay haci cu e departamento?

            “Kiermen, bo tin cu hustifica e cosnan, no pueblo. Gobierno ta di nos cu ta pueblo. Gobierno su BBO ta nos ta pague, nos mester tin mas curashi pa exigi contestanan di berdad. No bisa cu bo ta bay duna esey y esey. Mester contesta y aworaki contestanan tur ta vago, pero contesta real no tin y esey no ta debate!” Presidente di CUA, Frans Ponson a señala.