Presentacion di señora Michella van Loon tocante e Tratado di Istanbul

Presidente di SICA, señora Magaly Maduro:

• SICA ta sigui empodera y ekipa su miembronan 

ORANJESTAD (AAN): E asina yama Tratado di Istanbul ta un tratado internacional di derechonan humano cu tin como meta pa preveni violencia contra hende muhe y mucha muhe  y violencia domestico, proteha victimanan, combati y castiga esnan cu ta comete actonan di violencia contra hende muhe.

   E tratado aki a ser firma na 2011 y aunke cu Hulanda a ratifica e tratado aki na 2017, Aruba no a completa e paso pa ratificacion. Pa Aruba, e tratado ta representa un oportunidad pa eleva nos sistema di proteccion social y legal, fortaleciendo colaboracion entre institucionnan y creando un cultura di “cero tolerancia” contra violencia di hende muhe y mucha muhe.

   Den conexion cu esaki, diasabra ultimo, Soroptimist International Club Aruba (SICA), a organiza un presentacion exclusivo pa su miembronan cu e meta pa educa nan mas riba e Convenio di Estambul y ekipa nan cu conocimiento practico y profundo riba e tratado aki.

   Presidente di SICA, señora Magaly Maduro den un entrevista despues di e evento, a remarca cu SICA ta un organizacion cu ta lucha pa igualdad, paz y desaroyo y cu ta sigui traha activamente pa empodera hende muhe na tur nivel. Y pa e motibo aki tambe, un presentacion asina ta hopi importante pa nan miembronan.

   E sesion aki a ser presenta pa señora Michella van Loon, meester in de rechten, kende a trece mas claridad riba kico e tratado ta nifica pa nos region y, mas importante ainda, riba e rol crucial cu SICA, como NGO por hunga.

   Como un profesional comprometi cu bienestar social na Aruba, señora van Loon a logra traduci un tema legal compleho den un mensahe comprendibel y relevante pa e realidad local. El a enfatisa cu prevencion ta cuminsa cu educacion, cu consciencia, y cu balor pa kibra silencio.

   Segun, señora Maduro, durante e charla, participantenan no solamente a ricibi informacion, pero tambe inspiracion. Combati violencia contra hende muhe y mucha muhe ta un responsabilidad di tur ciudadano.

    “Nos a sali di e encuentro cu un sentido renova di proposito. Como Soroptimistanan, nos no solamente ta kere den igualdad, nos ta traha activamente pa crea un mundo unda tur hende muhe por biba liber di miedo y violencia”, señora Maduro a finalisa bisando.