PPA ta dispuesto pa forma parti di coalicion den gobierno of pa asumi nan responsabilidad como oposicion den Parlamento

Otmar Oduber a reuni cu Informador:

ORANJESTAD (AAN): Diaranson mainta, lider di Partido PPA, Otmar Oduber tabata cerca Informador, Sra. Tisa LaSorte pa un reunion siguiendo e proceso di formacion di un gobierno nobo.

            Oduber a duna di conoce cu esaki tabata un reunion sumamente interesante caminda a combersa riba hopi punto cu a bin ariba mesa. E escenarionan ta keda e mesun prioridadnan pa e proximo gobierno cu tin cu bay sinta.

            El a sigui bisa cu tabatin un eleccion cu tabata hopi duidelijk pa tur hende riba kico e prioridadnan ta manera costo di bida, atencion pa e pensionadonan y salud. E tres puntonan principal aki no por ehecuta nan sin haci e recortenan necesario pa reduci e gastonan den gobierno pa por logra e metanan y tambe pa negocia cu Hulanda.

            Otmar Oduber a indica tambe cu eleccion a papia bon cla. Pueblo a rechasa 5 partido cu tabata wordo representa den Parlamento di Aruba, incluyendo oposicion y esnan den coalicion. Di otro banda pueblo a vota masalmente pa dos partido nobo, PPA y Futuro, cu a genera mas di 11 mil voto.

            El a bisa cu e enfoke di e reunion tabata riba e programanan. A discuti riba e posibilidadnan. PPA ta mira cu cualkier coalicion, si kier un siguransa di un gobernacion stabil y cu no ta bay depende solamente di dos partido, e ora ey PPA mester por forma parti a base di e prioridadnan cu nan tin den nan programa.

            Oduber a enfatisa cu for di AVP no por mira un programa pa por a compara. Pero e otro tres partidonan por mira cu ta hopi alinea y cerca di otro. Cu AVP no tin un programa no ta kita cu por yega na acuerdonan por escrito pa cualkier coalicion cu ta bay sinta.

            Si PPA wordo yama pa forma parti di cua gobierno cu por ta PPA ta cla pa esey of pa asumi nan responsabilidad den Parlamento hibando un oposicion a base di un control y vigilancia fuerte ariba e gobierno di Aruba, Otmar Oduber a expresa.

            El a agrega cu den caso cu PPA forma parti di gobierno, pa loke ta su caso, dia 22 di januari lo tin e sentencia y nan lo pone como minister sea un persona cu ta un vak minister of un persona cu ta riba nan lista pa carga e responsabilidad. Nan no ta pone e persona. Mester wak prome kico e cartera ta.

            PPA lo dicidi riba su minister te ora cu tin un vonnis dia 22 di januari. Posiblemente su persona lo keda den Parlamento of lo dicidi den conseho di partido si lo bin un cambio of no pa loke ta trata e cartera cu PPA lo carga responsabilidad di dje den un futuro gobierno, Otmar Oduber a declara.