PPA lo no acepta e Landspakket riba mesa y tampoco ta di acuerdo cu e RAFT den un Rijkswet

Otmar Oduber ta insisti

Autodeterminacion y nos Status Aparte den Reino ta keda indiscutibel

ORANJESTAD (AAN): Otmar Oduber, lider di PPA ta expresa enfaticamente cu una bes nan haya sosten di pueblo, PPA lo lucha pa mantene nos autodeterminacion y nos Status Aparte den Reino.

   E ta puntra dicon awo si por tin un surplus den nos presupuesto, dicon awo si por a percura pa cumpli cu cierto ponencianan cu a bin di parti di Hulanda? Pasobra tin e presion riba e gobierno cu ta sinta na e momentonan aki y lamentablemente esaki ta bay a costo di e comunidad di Aruba, pasobra no a mira cu gobierno a baha un gasto, al contrario, continuamente por a mira con costo di bida ta aumenta na Aruba y cada biaha gobierno ta coba den cartera di nos comunidad.

   PPA lo lucha pa mantene nos autodeterminacion y nos Status Aparte den Reino atraves di manehonan concreto cu kier bay propone. Entre otro:    Un surplus basa riba reduccion structural di e gastonan di aparato gobierno y PPA ta compromete su mes cu minimo 12%, haciendo e aparato uno mas efectivo.    Un reforma fiscal caminda cu gobierno no solamente lo haya su fair share di economia creciente cu nos tin, pero cu lo percura primordialmente pa nos hendenan di Aruba haya un disminucion den e impuestonan cu nan ta paga, pa di e forma ey nan por tin mas placa den nan cartera, aumentando di e manera aki nan poder di compra.

Lo percura pa haci un analisis profundo di tur e departamentonan y tareanan cu tin den e departamentonan aki. Tin departamenonan cu ya caba no tin un funcion dentro di e tareanan publico y esakinan lo wordo privatisa, mientras cu otronan lo por wordo independisa y otronan por wordo unifica.

Lo independisa Departamento di Recurso Humano di Gobierno, DRH, sacando e decision aki for di Conseho di Minister. Mescos pa loke ta e ley di LMA, specificamente pa loke ta trata directornan di tur departamento caminda cu por bisa cu nan por wordo exclui di e LMA y firma un DVO (Dienstverlening Overeenkomst) cu gobierno, caminda nan ta carga responabilidad personal tambe den cada departamento pa percura cu e departamentonan funciona na e manera debido.    Adicionalmente ta bin cu un ley pa establece un cantidad maximo di puestonan di formacion pa tur departamento gubernamental como tambe pa e bureaunan di ministernan. Den pasado a conoce bureaunan di ministernan cu mas cu 100 hende trahando, otronan cu 60 pa 70 hende y PPA ta bisa cu esaki no lo por tuma luga mas y mester mare den ley pa e tipo di cosnan asina bolbe tuma lugar.

   Tambe lo regla den ley di contabilidad e post di goederen en diensten, cual ta unda mas abuso sa tuma lugar, y bou cual p.e. autonan di dienst, biahenan, huurmento di edificio, y consultancies ta cay. Via ley lo reglamenta cu un porcentahe maximo wordo determina den e presupuesto. Esaki ta algo cu sigur Hulanda lo aprecia, pero tambe ta algo cu nos mes na Aruba a deha pa hopi aña y ta unda por a mira cu presupuesto di Pais Aruba a dispara y tabata totalmente fuera di control.

   Crea cu un Aruba Property Fund caminda e 32 edificionan di gobierno cu na e momentonan aki ta den ruina lo wordo hinca den un compania 100% di gobierno. Na e momentonan aki tin 32 edificio cu no ta haya ni grondbelasting for di nan, mientras cu di otro banda ta bezig ta huur 46 edificio cu no ta di gobierno. Si cambia e situacion aki, facilmente por reduci gastonan.

Esaki ta algun di e 16 puntonan cu PPA tin relaciona cu reduccion di gasto di gobierno y pa haci gobierno mas efectivo y esakinan lo yuda Hulanda realisa cu di berdad ta comprometi pa cumpli cu loke un un gobierno tin cu haci.